Shillong, Rymphang 09: Ka Jylla Meghalaya kan sa ioh ia ka song pisa ba T. 500 klur ban theh ha ki kam pynroi ia ki jaka sor ha une u snem mang tyngka ba mynta.
“Nga sngewkmen ban pyntip sha phi ba na ka T.15,000 klur, ngi la buh ia ka jingtyrwa ba T. 619 klur na Meghalaya bad ngi la dep ioh jingmyntoi kumba T. 500 klur” pyntip u Myntri Rangbah ka Jylla Conrad K Sangma haba iakren bad ki nong thoh khubor hadien ba ka Kynhun Myntri kala ai jingmynjur ia ka Shillong Urban Mobility Policy, 2024.
Ula ong ba ka jingpynkylla ia ki kyndon ka Meghalaya Building Byelaws bad ka Shillong Urban Mobility Policy,2024 ki dei kiba la mynjur da ka jingthmu ban pynthikna ba ka Jylla kan ioh ia ki jingiarap song pisa ba kyrpang ban theh ha ki kam pynroi ha ki jaka sor.
U Conrad ula ong ba ka Sorkar ka khmih lynti ban ioh ruh sa T.100 klur hadien ka jingmynjur ia ka amendment.
Haba kren halor ka Policy, u Conrad ula ong ba ka Shillong Urban Mobility Policy, 2024 kan pynthikna ba ka iaid ka ieng ha Shillong kan kham biang noh bad bynrap ba kane kan kynthup ia ki kam ba iadei bad ki kali kamai paidbah, ka jingthaw ia ki lynti iaid kjat, pynduna ia ka jingkhapngiah bad nang pynbun ia ki jaka pynieng kali bad kiwei kiwei.
“Kane ka policy kan btin lynti ia ngi bad ai ha ngi ia ka thong ba kumno ngin lah ban pynjanai ia ka iaid ka ieng hapoh ka Jylla” ula ong.
Ha kajuh ka por, u Conrad ula pyntip ba ka Sorkar kan sa wanrah ruh da kawei pat ka policy ia kiwei kiwei ki district headquarter ka Jylla.
“Ngi la thmu ban wanrah da ka Urban Mobility Policy hynrei ngi shem ba ka Shillong ka kham pher na baroh bad kaei kaba lah ban leh ha Shillong kan ym long satia ha kiwei ki jaka kum ha Nongpoh lane Resubelpara. Kumta, ngi sa wanrah dala ki jong ki jong ki Policy ia ki District Headquarter” ula ong.
