Shillong, Jymmang 11: Ka long kaei kaei kaban sah jingkynmaw ha ka histori ia ka tnad pulit ka jylla bad ka jingsngew sarong ia ki jaidbynriew ba ka longkmie Khasi, kala shah thung kum ka Director General of Police ha Meghalaya.
Ka ophisar Indian Police Service(IPS) Kong Idashisha Nongrang, kaba dei ka Batch 1992, kala shah thung ban shimti ia ka kam DGP naduh ka 20 tarik u Jymmang hadien ba u Dr L R Bishnoi yn shongthait noh na ka kam.
Ia mynta ka Kong Nongrang kadei ka Director General of Civil Defense and Home Guards jong ka Meghalaya.
Ha ka jingpynbna ka ba la pynmih da u Lat ka Jylla, la kdew ba ka Kong Nongrang kala shah jied napdeng ki katto katne ngut ki ophisar IPS kiba la don ha ka thup kyrteng, kaba la phah da ka Empanelment Committee jongka Union Public Service Commission (UPSC).
Ka Kong Nongrang kan shakri ha katei ka kyrdan ban pynkhlain ia ka jingai jingshakri paidbah bad ban pynthikna ia ka shongsuk shongshngain na ka bynta 2 snem naduh ka 20 tarik u Jymmang haduh ka 19 tarik u Jymmang 2026.
