Shillong, Nailur 27 : Ka Lafarge Umïam Mining Private Limited (LUMPL) ka la shah jied kum ka kompeni kaba wan nyngkong lut lane “Overall First” ha ka Directorate General of Mines Safety (DGMS) na ka bynta ka jingshngaiñ ka rukom treikam jong ka ha ki par kiba don ha baroh ka thaiñ shatei lam-mihngi jong ka Ri.
Ïa katei ka khusnam ka LUMPL ka la ïoh ha ka jingïalang kaba long dang shen ha ka 18th North East Metalliferous Mines Safety Week jong u snem 2020-21 kaba long ha Guwahati ha ka 19tarik mynta u bnai hapoh ka lama jong ka DGMS, Ministry of Labour and Employment jong ka sorkar pdeng.
Ha ka sngi ba sam ïa ka khu snam la donlang ruh u Ujjwal Tah, Deputy Director General of DGMS, Eastern Zone kum u Kongsan bad Yohan Yejerla, Director of Mines Safety, DGMS, Guwahati Region uba pynïaid ïa ka jingïalang.
Ka jingai ïa ka khusnam sha ka LUMPL kadei hadien ka jingbishar bniah ba la leh da ka komiti ba kyrpang hapoh ka jingpeit bniah jong ka DGMS, Guwahati Region. Baroh lang ki don haduh 13 tylli ki par kiba shim bynta ha katei ka Mines Safety Week 2020-21, kaba long naduh ka 14tarik haduh 20 tarik u Rymphang ban pyni haduh katno ki kompeni ba pyntrei ïa kitei ki par khlong mar poh khyndew ki shimkhia ban peit ïa ka jingshngain ha ka rukom treikam.
