Shillong, Iaiong 05: U Prof Tanie Natung bad ka kynhun jongu na ka Hospital NEIGRIHMS kila ïoh pdiang ïa ka khusnam ‘Best of Indian Journal of Ophthalmology Award’ ha ka 40th Asia-Pacific Academy of Ophthalmology Congress ha ka jingiatreilang bad ka 83rd Annual Conference jong ka All-India Ophthalmological Society kaba la long 3-6 tarik u Iaiong 2025 ha New Delhi
Palat 13500 ngut na ki ri bapher bapher kila wan iashimbynta bad iasam ia ki jingtip halor ka Science, ki jingshem, ki jinghikai bad ki jingmih na ki jingwad bniah ha kane ka jingialang jongka APAO-AIOS.
Ia kane ka khusnam la ai na ka bynta ka jingwad bniah kaba la ianujor ia ar tylli ki buit ha kaban jied ia ka rukom khein ia ka bor kaba biang tam ha ki ‘Lens’ na ka bynta ki jingpang ‘Cataract’ da kaba pynbha ia ka jingiohi jong ki nongpang kiba duna eh haka bor iohi.
U Prof Natung ula bynrap ba kane ka jingwad bniah kan btin lynti ïa ki doktor khmat ha kylleng ka pyrthei ban ai ïa ki jingmih kaba bha tam ha ka jingsumar ia ki khmat. Ka Dr Ishita Pandey, Dr. Benjamin Nongrum bad ka Dr. Ester K Sekhose na ka Department of Ophthalmology NEIGRIHMS kila pynlong ia kane ka jingwad bniah kaba lam khmat bad btin lynti da u Prof. Tanie Natung
Na ka liang u Director ka NEIGRIHMS, u Prof Nalin Mehta u la ai khublei ïa u Prof.Tanie Natung bad ia ka kynhun ka jongka ha ka jingtrei shitom ha kaban leh ia ki kam wad bniah ha kaba iadei bad ka kam ai jingsumar ia ki khmat.
Ka Indian Journal of Ophthalmology ka long ka thup jingthoh kaba pawnam bha bad kaba la pynphriang bha bad kaba wanrah ia ka jingkylla kaba bha.
Ka Asia-Pacific Academy of Ophthalmology kadei ka kynhun kaba heh tam jong ki doktor khmat jong ka thain Asia Pacific & ka All India Ophthalmological Society ka dei ka kynhun kaba heh tam jong ki seng kiba ai ia kano kano ka jingsumar kaba don kumba 27000 ngut ki dkhot haduh mynta.
