Shillong, Kyllayngkot 06: Ka jingynmih ia ki dohkha ha ka jylla Meghalaya kan sa nang kiew shuh shuh hadien ba ka sorkar pdeng kala mynjur ban kyntiew ia ka kam ri dohkha hapoh ka East Khasi Hills District.
U Myntri ka sorkar pdeng u Rajiv Ranjan Singh hynne ka sngi nyngkong ula buh ia u mawnongrim na ka bynta 50 tylli ki projek ban pynmih dohkha ha ka thain Shatei Lam Mihngi kaba kot T. 50 klur hapoh jongka Pradhan Mantri Matsya Sampada Yojana (PMMSY).
Ia katei laleh ha ka Northeastern Region States Meet kaba la pynlong da ka Department of Fisheries, kaba pyni ia ka jingskhem jingmut jongka sokar ban kyntiew ia ka kam ri dohkha bad ban kyntiew ia ka rukom im jong ki paidbah. Ha kaba ka sorkar pdeng kala bhah T.38.63 klur na ka T.50 klur.
Kine ki sienjam kidei kiba la pynwandur ban kyntiew ia ka kam ri dohkha ha ka thain ban pynmih ia ki dohkha bad ban plie ia ki lad ban aikam aijam.
Ka jinglut jingsep jong ka projek ha Meghalaya ka long T. 50 lak ha kaba ka jingbhah jong ka sorkar pdeng ka long T.27 lak bad ka bhah na ka bynta ki nongioh jingmyntoi ka long T.20 lak.
“Ka projek ha Meghalaya kan pynleit jingmut ha kaban kyntiew ia ki kam ri dohkha ha ka East Khasi Hills District. Kane ka jingthmu ka long ban kyntiew ia ki kam ri dohkha ha ki jaka kiba khring bha ia ki nongjngohkai bad la khmih lynti ba kan khring bha ia ki paidbah, ban pynmih ia ki lad iohkam iohjam bad ban kyntiew lang ruh ia ka kam jngohkai” la pynpaw ki heh ophisar.
Ha Assam yn tei ia ka Integrated Aqua Park ha Darrang District, ia kaba la khmih ba kan pynmih 150 MT ka dohkha man la ka snem. Kan pynmih T.10-15 klur ia ka khajna bad ban thaw 2,000 tylli ki lad ban iohkam iohjam. Katba ka Fish Feed Plant kaba heh ha Kamrup District kan pynmih 20,000 MT ia ki jingbam dohkha man la ka snem, katba ki Hatchery Project ha kylleng ki district kidei da ka jingthmu ban pynmih 50 million ki symbai dohkha man la ka snem kaban kyntiew ia ka kam ri bad ban pynmih dohkha.
Ha Manipur yn iohi ia ka jingtei ia ki Ice Plant bad Cold Storage Unit ha Thoubal bad Imphal District ban pynneh ia ki dohkha kiba la pynmih bad ban pynduna ia ka jingduhnong.
Nalor kane, ki jaka pynmih ia ki symbai dohkha kin pynleit jingmut na ka bynta ki dohkha kiba kongsan kin iarap ha kaban nong synniang ban pynneh pynsah ia ka jingling jingman bad ia ka jingpynmih ia ki dohkha ha ka jylla.
Ki 3 tylli ki projek ha Nagaland ki kynthup ia ka jingtei ia ka Freshwater Finfish Hatchery ha Mokokchung ban Kiphire district. Kine ki jaka pynmih symbai dohkha kin pynmih kumba 21 million tylli ki symbai dohkha man la ka snem ban kyrshan ia ka kam ri dohkha ha ka thain bad ban plie lad ruh ban kyntiew ia ka ioh ka kot jong ki paid riewlum.
Ki projeck ha Tripura kin kynthup ia ka jingtei ia ka Ornamental Fish-Rearing Units bad Finfish Hatchery. Kine ki jingthmu ki long ban pynpaw nam ia ka jingpynmih ia ki dohkha tynrai kiba don ha ka thain bad ban thaw ia ki lad ban pynioh kam ia ki trai jylla.
Ka thain shatei lam mihngi jong ka ri ka don ha ka bynta kaba kongsan hapoh ka ri India ban lah pynmih nalade ia ki dohkha bad ia ka kam ri dohkha, kaba pyni ia ka jingthmu jong ka sorkar kaba iengskhem ha kaban kyntiew ia kane ka bynta. Da ka jingdon ia ki um ki wah kiba kyrhai, ka thain shatei lam mihngi kam dei tang ka jaka kaba lah ban leh ia kiei kiei hynrei kan kylla long ruh kum ka thain kaban kiew shaphrang hapoh ka jingialam jong ka sorkar.
Ka sorkar kala ai jingmynjur ban bhah tyngka kaba kot T. 2,114 Klur ia ka kam ri dohkha lyngba ka Blue Revolution Scheme, ka Fisheries and Aquaculture Infrastructure Development Fund (FIDF) bad ka Pradhan Mantri Matsya Sampada Yojana (PMMSY). Kine ki sienjam kila iarap ha kaban pynbiang ia ki jingdonkam ha kaban te ia ki jingtei kiba kongsan, ban pynkhlain ia ka jingpynmih bad ban pynneh pynsah iaka rukom leh ne treikam. Ka jingpynmih ia ki dohkha ha ka thain shatei lam mihngi kala kiew na ka 4.03 lak ton ha u 2014-15 sha ka 6.41 lak ton ha u 2023-24 bad kane ka jingkiew kala kynjoh sha ka 5%.
Da kaba ithuh ia ka jinglah ban leh bha ha ka ba iadei bad ka kam ri dohkha bad ka jingpynmih ia ki dohkha, ka Department of Fisheries (DoF) kala buh hakhmat ban tei ia ki aquaculture parks kiba katkum kane ka juk kaba mynta bad ki Fish Processing Unit ryngkat bad ka kyntiew ia ka jingpyndonkam ia ki kor technoloji kum ka Biofloc Systems bad Recirculatory Aquaculture System (RAS). Kine ki jingpyrshang ki long ban kyntiew ia ka jingpynmih ia ki dohkha, ban pynkhlain ia ka jingiadei iathied bd ka lad kaba ki nongrep ki lah ban pyniaid ha ki iew ki hat.
