Shillong, Iaiong 30 : Ka Shillong kaba la ioh ia ka jingithuh kum ka ‘Music Capital’ ka Ri India, kala ioh biang ia ka jingithuh kum ka ‘Jaka ba thnem” (Hotspot) ban pynlong ia ki Live Concert jong ki kynhun nongrwai bad nongtem ba pawnam ka pyrthei.
Kane ka jingiathuh kala wan ha ka dur jong ka kaiphod bala pynkhreh da ka EY-Panthenon (EY-P) kaba dei ka Consulting Firm bad ka BookMyShow Live, kaba la ai kyrteng “India rising concert economy” hadien ka concert ka kynhun tem Coldplay ha Ahmedabad.
Kane ka kaiphod ka long kum ka lynti iaid (roadmap) ia ki sor kum ka Shillong kaba la ioh jingithuh la slem halor ka jingriew spah ha ka put ka tem, ba kan kylla long ka jaka ba hakhmat ban pynlong ia ki Live Entertainment .
Kumba kdew ha ka BookMyShow annual entertainment consumption report :Throwback 2024, ka Shillong kala sakhi ia ka jingkiew haduh 65 shah ha ki tamasa iaput iatem tang ha u snem bala lah.
Ka jingnang paw jong ka Shillong kala nang kiew shuh shuh da ka jingwan jong u kaitor ba pawnam ka pyrthei Ed Sheeran ha Shillong kum shi bynta na ka India Tour haki 6 tylli ki Sor ha u bnai Rymphang 2025, kaba pyni dak ia ka jingkylla long ka iew ba thnem ia ki nongrwai bad nongput nongtem ka pyrthei bad ka ri India.
Kat kum ka kaiphod, ka concert ka kynhun tem Coldplay ha Ahmedabad kala pynmih haduh T.641 klur ka jingioh ba kynthup ia ka jingnang kiew ka ioh ka kot ka Ahmedabad da T.392 klur bad synnoang haduh T.72 klur sha ka GST ka Sorkar India.
Halor 222,000 ngut ki nongieid jingrwai na ki 500 tylli ki sor, 28 tylli ki Jylla bad 5 tylli ki Union Territories kila wan sha kane ka concert, kaba la kyntiew ia ka kam jngohkai, ki jaka ba pynbiang ia ka thiah ka dem, ki nongdie jingdie bad ki nongkamai kali.
U Myntri Rangbah duh ka Ri Narendra Modi haba kyrshan ia ka concert economy ha India (ka jingkyntiew ia ka ioh ka kot lyngba ki tamasa iaput iatem) ula ong ba ka concert ka Coldplay ha Mumbai bad Ahmedabad ka long ka sakhi ia ki lad kiba bun bad ki jingdawa ba nang jur ia ki live entertainmeng hapoh ka Ri.
 ban pynlong ia ki Live Concert jong ki kynhun nongrwai bad nongtem ba pawnam ka pyrthei.){kind=link}