Ioh bat ka KSU ia u Pulit ba khrong pisa T.1000 shikhlieh na ki bar jylla ban pynrung tuh sha Meghalaya

Dawa ia ka Tnad MLP ba kan tohkit ban wad ia ka jingshisha halor une u briew

Shillong, Nailar 06 : Ka Khasi Students’ Union (KSU)-Umiam Circle ha ka step sngi Balang (6 tarik Nailar), kala ioh bat ia uwei u Pulit uba la kynnoh khrong pisa T. 1000 shikhlieh na ki bar jylla, ban pynrung tuh ia ki sha Meghalaya.

Une u Pulit u kyrteng u Brill Rongpeit, uba la pyni sngew sarong ia ka Identity Card jong ka Meghalaya Police (MLP) 1st Battalion, Mawlai Mawiong, bala ai da u Commandant ha ka jingleit tuklar jong ka KSU ia ka kam ba u leh.

Kat kum ka kyrwoh, ka KSU-Umiam Circle hapoh ka jingialam u President Bashem Kharnaior, kila mih ha ka step 6 tarik Nailar ha ka por 6 baje sha surok halor ka jingioh khubor ia ka jingdon ki mynder kiba wan rung da ka kali AS25-CC-4375 ha ka jingialam lynti uwei u briew uba kam ialade kum u Pulit.

Ka iathuh ba une u briew ula pyni ia ka Police Identity Card kaba don ka kyrteng Brill Rongpeit, kaba la kam bala pynih da ka Ophis u Commandant ka MLP 1st Bn, Mawlai Mawiong, Shillong.

“Ha ka por jong ka jingiakren bad ka jingbishar, ka KSU kala lap ba une u briew (Pulit) ula lum pisa haduh T.1000 na ki san ngut ki bar jylla kiba shong ha kane ka kali bad ong ba kane ka pisa ka dei kum ka bai rung sha ka Jylla”ong ka kyrwoh.

“Hynrei ha ka por ba ka seng ka dawa ban pyni ia ki kot ki sla kiban pynshisha ia ka jinglum pisa, une u briew uba kam ialade kum u Pulit lem bad kitei ki san ngut ki bar jylla, kila phet krad noh na ka jaka, khlem da pynshisha satia” kala bynrap bad ong “Ka jingphet noh kynsan jong utei u briew bad kitei ki bar jylla ka la nang pynjur shuh shuh ïa ka jingsuba sniew jong ka seng ia kitei ki briew bad ruh ia utei u briew u ba kam ialade kum u pulit”.

Ka KSU ka pyntip ruh ba mar mar ki nongialam ka Unit kila pyntip noh ia kane ka jingjia sha ka KSU Mawlai Circle ba kan ai ka jingiatreilang bad buddien ban lap ia kine ki briew.
“Kane ka jingjia ka pyni ba ka don ka jingkheiñ sting ha ka rukom peit ïa ka jingrung jingmih bad ka lah ruh ban don ka jingïatreilang kaba be-aiñ kaba ai lad ïa ka jingrung be-aiñ jong ki bar jylla” kala kynthoh.

Ka KSU ka pynpaw ba kane ka jingjia ka long kaba sngewsih bad kaba pynbitar shikatdei eh, khamtam ha kane ka por ba ka jingrung kyrthep jong ki briew nabar jylla sha ka jylla Meghalaya ka la nang kiew stet.

“Ka jingdon u briew uba kam ialade kum u pulit bad uba lum pisa na ki bar jylla ban ai lad ïa ka jingrung jong ki ha ka jylla, ka dei ka kam kaba die tad dor ïa ka hok bad khein troin ia ki trai jylla bad ka jingpyndonkam bakla ia ka uniform pulit” kala ong bad bynrap “Ki bor pulit ki dei ban peitngor bad tehlakam ïa ka jingrung bad jingmih be-aiñ, hynrei kane ka jingjia ka pyni ba ka don ka jingtreilang kaba sniew lane ka jingpyndonkam bakla ïa ka bor”.

Ka KSU ka dawa ia ka Tnad Meghalaya Police ba kan pynshai ïa ka jingshisha jong u briew uba la tip kyrteng kum Brill Rongpeit. Ka daw aba dei ruh ban pynshai: la u Brill Rongpeit u dei shisha u pulit uba don ha ka kam bad u ba pyndonkam bakla ïa ka kyrdan ne ka kam jong u, ne u dei tang u briew uba kam ïalade kum u pulit ban pyniaid ïa ki kam be-aiñ.

Kane ka jingjia ka pynkhih shisha ïa ka jingshaniah jong ki paidbah ia ka tnat pulit, khamtam lada kam don kano kano ka jingshai lane ka jingkit khlieh kaba biang na ka liang ki bor synshar.

Lada ka long kaba suk ba ki briew kin pyndonkam ïa ka ID pulit khlem hok, kane ka pynpaw ba ka don ka jingsynjor ha ka jingpeitngor na ka liang kiba don ka aiñ.

Ka jingsngewkhia ka mih ruh hadien ka jingpyndam noh ia ka jinglong nongshon shnong bad ka jingkhynra jong ka sorkar Assam ia ki Bangladeshi ha katei ka jylla, kaba pynlong ia ka seng ban sngewsyier ba kine ki Bangladeshi kin wan buhai shnong sha Meghalaya, kaba lah ban wanrah ia ka jingkiew jong ka jingwan rung beain (influx) sha ka jylla.

Ka KSU ka pynpaw ba ka dang ïeng skhem ban ïada ïa ka jinglong trai, ka jingim bad ka hok jong ka Jaitbynriew. Ka seng kan dang bteng ban ïakhun pyrshah ïa kino kino ki rukom rung be-aiñ, ne ki kam kiba pynsniew ïa ka imlang sahlang bad ka jingkhanglad ia ka jingrung kyrthep ki mynder.

Ka seng ka kyntu ruh ïa ka sorkar bad ka tnat pulit ba kin pynlong ia ka jingtohkit kaba bniah bad ban pyntreikam ïa ki lynti treikam ba biang khnang ba kane ka jait jingjia kan ym mih biang ha ki sngi ban wan.