Shillong, Rymphang 09 : U Myntri Rangbah ka Jylla Conrad K Sangma hynne ka sngi Thohdieng, ula kdew ia ka jingkongsan ban don ka jingiasyllok hapdeng ki Jylla bad hapdeng ki Ri ka pyrthei halor ka jingkylla ka suinbneng bad ka mei mariang.
“Ka Um kam don ia u pud u sam bad haba phai sha ki ishu kum ka um bad ka mariang, ka long kaba donkam ban don ka jingiasyllok hapdeng ki Jylla bad hapdeng ki Ri ka pyrthei. Lada ki Jylla ba marjan ne Ri ba marjan kin iatreilang bad ki jing pyrshang jong ki lem bad ka thong, ngin ym kynjoh ia ka thong ba ngi kwah” ong u Myntri Rangbah haba ai jingkren ha ka International Water Conclave ba nyngkong eh ha Shillong.
Despite having locations with the heaviest rainfall record in the world, the issue of water looms over many areas in our State and realising this, the Govt., has been taking proactive steps since 2018 to mitigate the water crisis through community participation, use of technology… pic.twitter.com/4D73put3BC
— Conrad K Sangma (@SangmaConrad) February 9, 2024
Haba ban jur halor ka kamram jong ka Climate Council hapoh ka Jylla, ha ka thain bad hapoh ka Ri, u Myntri Rangbah ula ong “Ki kam ba iadei bad ka jingkylla ka suin bneng kala ktah jur bha ia ka jingdon ki tyllong um. Ka jingiashim bynta lang jong ki kynhun bapher bapher ban iasyllok bad iatreilang halor ki kam mariang kan myntoi bha lashai lashisngi ha kaban lah leh eiei ia kane ka jingeh”.
Haba kren halor ka International Water Conclave, ula ong “Ka thong jong ka conclave ka long ban wanrah lang ia ki Tnad treikam bapher bapher ka Jylla bad ki Dkhot bapher bapher jong ka Imlang sahlang ha kaban lah leh eiei ia kane ka kam ym tang ban shu pynleit jingmut ha ka jingpyntreikam ia ki skhim lane pyndep ia ka thong”.
Haba kdew ia ka jingkongsan ka Water Policy, u Myntri Rangbah ula ong “Ka Meghalaya kala shimkhia bha ha kane ka bynta bad ka dei kawei na ki katto katne ki Jylla kiba don ia ka State Water Policy, kaba dei ka sienjam kaba iar bha halor ka um naduh ka jingsam, jingpyllang, ki pukri, ka jingiada ia ki khlaw ba don tyllong um (catchment area), ka jingpyn im biang ia ki shyngiar ban lah pynbiang tarajur ia ka rukom pyndonkam ia ka um”.
Ula ong ba ka Policy kala pynlah ia ka Sorkar Jylla ban leh eiei ia shibun ki jingtynjuh bad ki jingsngewkhia kiba iadei bad ka um.
U Conrad ula ai jingmut ruh ia ka jingdonkam ia ki kor technology ban lum jingtip bad jingkhein bad ban peit pyrman ia ki bynta bapher bapher kiba iadei bad ka um.
“Shen ngin sa don ia ka Data Innovation Centre ban lum jingkhein bad jingtip” ula ong haba pyntip ba ka Asian Development Bank kala ai jingkyrshan ia ka Sorkar ban shna ia 600 tylli ki Multipurpose reservoir kiba rit ha kylleng ka Jylla. Nalor kane, kila don ruh haduh ki 81 tylli ki sanctuary ri dohkha hapoh ka Jylla.
Ha kane ka conclave ba arsngi la wan iashimbynta da ki nongmihkhmat na Thailand, Nepal, Bhutan, Myanmar, Cambodia bad Vietnam nalor ki kynhun na ki Agency bapher bapher bad kiwei kiwei.
Kum shibynta jong ka conclave, kan sa don ruh ka jingiasoi ia ka Shillong Declaration da ki nongiashimbynta na kine ki Ri.
Ha kane ka jingialang, la wan iashimbynta ruh da u Myntri ka Tnad Water Resources Bah Comingone Ymbon, Myntri ka Koit ka Khiah Kong Ampareen Lyngdoh, Myntri ri dohkha Bah A.L.Hek bad na ka Ministry ka Jal Shakri ka Ri India Debashree Mukherjee.
