Shillong, Nailur 12 : U Myntri Rangbah ka Jylla Conrad K Sangma ha ka sngi Ba-ar, ula pynpaw ba u sngew sarong ban pyndonkam lang ia ki kyrteng ‘ India’ bad ‘Bharat’ haba jer kyrteng ia ka Ri namar ka dei kumba la pruid dak ha ka Riti Synshar ka Ri.
Haba pynpaw ba kam don satia kano kano ka jyrwit jyrwat ha kane ka kam, u Conrad ula ong “Lada nga kren ha ka Hindi, ngan pyndonkam ia ka kyntien Bharat, lada nga kren da ka phareng nga pyndonkam India. Ka Riti Synshar ka Ri kala kren shai bha ba ka India ka dei ka Bharat. Kam don jyrwit jyrwat hynrei nga sngew ba ngi dei ma ngi kiba pynmih ia ki jyrwit jyrwat haba ym don jyrwit jyrwat”.
“Peit kane ka ishu lada phi kylli ia nga ha u 1947 lane 1950 ha ka por ba mih ka Riti Synshar ka Ri, ka rai ka long kaba kongsan. Ha katei ka por, ki nongthaw ia ka Riti Synshar bad ki Nongthoh kot bad ki Nongialam sain pyrthei kila rai baka dei ban dei Bharat bad India bad kaei kaba ngi leh mynta ka long ba ngi bud ia ka Riti Synshar ka Ri”.
U Myntri Rangbah ula ong ba ka shong ruh ha ki khep ki khep, ha kiba bun ki jingkren jong u haba u kren da ka Hindi, u ju pyndonkam beit ia ka kyntien Bharat namar kane ka dei ka India bad ha kiba bun ruh ki rynsan, ula pyndonkam ia ka kyntien India.
“Ngam sngew ba ka don ka jyrwit jyrwat, ka dei tang ha ka jingpyndonkam ia ka ktien ka thylliej bad ngam sngew ba ka don ka jingbakla ha kaba pyndonkam ia ka kyntien la ka dei ka India ne Bharat. Baroh ka shong ha ki khep ki khep ba phi don. Ka Riti Synshar ka aibor ia ngi ban pyndonkam ia ka kyntien India bad Bharat bad nga sngew sarong ia baroh ar” ula ong.
