Nongstoiñ, Nohprah 18 : Kham niar eh ban shem ia ki briew kiba ieid thep mynsiem iala ka tynrai, kiba bat skhem triang iala ka riti ka dustur ba aipateng ki longshuwa bad kiban ialeh ruh kumno ban nang pynriewspah shuh shuh ia ka. Kane ka dei ka jingim jong uwei u rangbah uba la im sngi ban ri ban sumar bad pynriewspah iala ka tynrai nalor ka kam ri jingri ban kyndoi jakpoh.
Une u Rangbah u dei u Bah Dominik Umsong, uba dei na ka shnong Riangpoit kaba hap hapoh ka West Khasi Hills District.
Ka Riangpoit ka dei ka shnong kaba la rim bha ha West Khasi Hills, kaba phi lah ban lap ia ki nongshongshnong kiba don ka akor ka burom bad ba pariah parain bha ia ki lok ki jor bad ki nongwankai. Kane ka shnong ka dei ruh kaba seisoh bha ha ka rep ka riang, ki soh ki pie bad kaba don ia ki nongshongshnong kiba ieid ia ka kam thain jingthain kum ki prah, ki shang, ki khoh, ki star bad kiwei kiwei.
U Bah Dominik Umsong u dei uwei na kine ki nongshongshnong uba kham paw na ka thain bad uba don ia bun ki sap ba la ai da u Blei-khamtam ban pynriewspah iala ka jong ka tynrai. Kane ka jingpynriewspah ia ka tynrai ka dei lyngba ka sap ban shna ia ki tiar put tiat tem nala tynrai ia kiba bun na ngi mynta, ngim lah ban iohi ne ithuh satia.
Kine ki tiar tem tiar put tynrai kiba dang don mynta satang sha ki jaka nongkyndong, niar eh ban shem ha ki jaka sor, ki kynthup ia ki Tangmuri, ki Tang Besli, ki Tanglot, ka Maryngod, ka Marynthing, ka Ksing, ka Duitara, ka Sitar bad kiwei kiwei ki tiar tem tynrai ba ju pyndonkam da ki longshuwa.
Ia kine ki tiar tem u ju shna tang da ki siej kiba u ju pom haba wanphai na ka lum sharai masi -kaba u ju pynlut por tang mynmiet ban shna ia ki hala ka jong ka Iingsah.
Nalor kane, u don ruh ia ka sap ban shna ia ki tiar rep kiba la ai jingmyntoi ia ki paid nongrep ka thain ha kiba bun ki liang.
Nalor kane, ban kamai kyndoi jakpoh, une u rangbah ula im sngi ruh ha ka kam ri jingri kaba phi lah ban iohi haba leit sha ka iingsah jong u. Une u rangbah u kham sngewtynnad eh ha ka kam ri masi bad ri ngap bad tang ki masi ba u ri, kila kynjoh ia palat shispah sanphew tylli lada khein lang bad masi khun bad masi kmie. Manla ka sngi u ialam ia kine ki masi ban pynioh ia ka bam na ki lum ba jyrngam jong ka thain ba kin plung bad ban heh ban san.
Nalor ki masi, u don ruh ia ka sap ri ngap –kaba phi lah ban iohi ia ki ksing kiba dap ha ka kper bad ka iingsah jong u . Une u rangbah u ri ia ki jait ngap kiba rit bha-kiba ju khot ki ngap dkai-kaba ka umngap jong ki, ka dei kaba rem dor tam bad ka dork a lah ban poi haduh T.2000 shi bilor.
Une u Rangbah u dei ruh u nongrep soh uba stad bad ki diengsoh khamtam u sohniamtra, kiba u thung, ki la kot da ki spah tynrai.
Haba iakren bad Ka Shlem, u Bah Dominik ula pynpaw ia ka jinglyngngoh ba ki briew ha kine ki sngi kila ud la nam ia ka jingbym donkam donjam bad ong “Lada phim pyndonkam ia ka sap ba ai u Blei bad ba phim kwah ban trei shitom, ban shu ap ia kaba iohsuk hi, kan buh ia phi ha ka jingeh….Khih ksar bad nang ban pyndonkam ia ka spah ba ai u Blei ha ka mariang, ka lynti kan sa plie”.
