Shaei jah ki Liang Pyrshah kynthup ka seng ieid Jaidbynriew VPP?
New Delhi, Risaw 02: Ha kine ki arsngi bala leit noh, ka Nongbah Delhi kala sawa da ka sur jingdawa ban ai jingithuh noh ia ka Ktien Khasi kum ka Official Language hapoh ka Khyrnit ba phra jong ka Riti Synshar ka Ri bad bun ki seng sain pyrthei, ki Sengbhalang bad ki riewshemphang kila iatylli kawei ban pynpaw ia ka jingsngewkhia ha ka jingiashong kyllain mungot ha Jantar Mantur, kaba long ha ka sngi U Blei.
Hynrei kyndit pat ban iohi ba ym shym la iohi syrngiew satia ia ki seng sain pyrthei ka Liang Pyrshah khamtam ka Voice of the People Party (VPP) kaba ju kren ieid jaidbynriew na ki rynsan bapher bapher.
Ia kane ka jingiashong kyllain mungor la pynlong da ka Khasi Author Society (KAS) bad la iashimbynta da ki Myntri Sorkar ba kynthup ia ka Nongialam ka NPP Dr Ampareen Lyngdoh, Myntri kam jngohkai bad Working President ka UDP Bah Paul Lyngdoh, u President ka UDP bad Lamphang Barim bah Metbah Lyngdoh, MLA Bah Renikton Lyngdoh Tongkhar bad kiwei.
Kane ka jingiakhih kala iohi ruh ia bun ngut ki riewsain pyrthei ba kynthup ia u Myntri barim bad Nongialam ka NPP Bah Hamletson Dohling bad Bah Samlin Malngiang, kiba la wan ai ka jingkyrshan ba pura ia kane ka jingdawa.
Ia ka kynhun na ka Khasi Hills Autonomous District Council (KHADC) la ialam da u Chairman Bah Lamphang Blah nalor kiwei kiwei ki MDC.
Thamula ba ym don uwei ruh u nongialam na ka VPP ban iadonlang ha kane ka jingiakhih ban ioh jingithuh ia ka ktien Khasi ha ka khyrnit ba phra namar ki dang iabun kam ban pynrung dkhot ia ki briew ban pynkhreh ia ka elekshon MDC ha Ri-lum Khasi bad Jaintia.
Ym shym la iohi ruh ia kiwei ki Nongialam ka Liang Pyrshah ba kynthup ia u Nongialam ka Liang Pyrshah bad MLA ka Congress Bah Ronie V Lyngdoh lem bad u Nongialam ka AITC Bah Charles Pyngrope.
Lah ban kdew ba ka jingdawa ban pynrung noh ia ka Ktien Khasi ha ka khyrnit ba phra ka dei kaba la sdang naduh ki 40 snem bala leit noh ia kaba la lamkhmat da ka Khasi Author Society.
Ha kane ka jingiakhih ba long myn ha ka sngi Saitjain, ki Nongialam jong ki Sengbhalang bapher bapher ruh kila wan iashimbynta ban pynpaw ia ka jingkyrshan ia kane ka jingdawa. Kine ki Nongialam ki kynthup jong ka seng Khasi Students’ Union (KSU), Federation of Khasi Jaiñtia and Garo People (FKJGP), Hynniewtrep Youth Council (HYC),Jaiñtia Students’ Union (JSU) bad baroh kine ki seng kila pyrta ia ka kyntien “Ïm ka ktien, ïm ka jaidbynriew,” kaba la sawa jam ha Jantar Mantar.
U Bah Kynpham Sing Syiem, Nongialam ka KAS ula ban jur halor ka jingdonkam ban pynlong noh da ka ‘mass movement’ khnang ba kane ka jingdawa kaba la slem bah kan urlong bad seisoh noh. Ka KSA shuwa kane, kala pynlong ia ka National Seminar halor ka ‘Ktien Khasi, ka thoh ka tar bad ka kolshor’ ha Delhi.
U Bah Kynpham ula ong ba ka jingthmu jong kane ka National Seminar ka long ban pynkhlain ia ka jingdawa jong ki bad ban pyni hakhmat ka Sorkar Pdeng ia ka jingdonkam kyrkieh bad jingshimkhia ha kaban ithuh noh iaka Ktien Khasi.
Haba ban jur ia kajuh ka mat, ka Myntri Sorkar Dr Ampareen Lyngdoh kala kyntu ia baroh ban iasnohkti lang. Kala ban jur halor ka jingdonkam ba baroh ki seng sain pyrthei kin iamih ryntih khlem ka jingleh politics bad ban iatreilang kum kawei ka bor ha kaban tynruh ia kane ka jingdawa ba kan seisoh noh.
“Ngi donkam ban phaikhmat noh sha ki jingialum paidbah, lah biang ka jingiakren ha Iingdorbar khnang ba ngin lah ban pyni sha ka Sorkar India ba ka jingithuh ia ka Ktien Khasi ka dei kaba ka jingphohsniew kaba la slem jong ki paidbah” kala ong.
Ka kong Ampareen kala ong ba ki Sorkar Jylla kynthup ia kaba mynta bad kiba la leit noh, kila shim shibun ki sienjam ban lah pynurlong ia kane ka jingphohsniew hynrei “ngim pat iohi satia ba kan seisoh” kala ong.
Ka Myntri ka pyntip b aka Ktien Khasi ka dei kawei na ki 38 tylli ki Ktien kiba la don ha ka thup ban ai jingithuh noh da ka Sorkar India ha ka jingpynkylla ia ka Khyrnit ba phra ka Riti Synshar ka Ri.
