Nongpoh, August 13: U Chancellor ka University of Science and Technology, Meghalaya M. Hogue ha ryngkat ki nonghikai bad ki samla pule, ki la pynrem jur ia ki jingkynnoh u Myntri Rangbah ka Assam Himanta Biswa Sarma ba ka jingshlei um ha Guwahati ka dei na ka daw jong ka USTM.
Ha ka jingïakren bad ki nongthoh khubor ha ka sngi Nyngkong, u Hogue bad kiwei kiwei ki nongmihkhmat jong ka skulbah ki la pynpaw ïa ka jingbym sngewtynnad jong ki halor ka jingpyndonkam jong u Sarma ïa ka kyntien “Flood Jihad,” kaba ki kynthoh ba ka ktah ïa ki jingsngew ia ka niam.
Ki la ban jur ba ïa ka USTM la seng na ka bynta ban shakri ïa ki samla pule na baroh ki jaidbynriew ha kylleng ka Meghalaya bad ka thaiñ Northeast baroh kawei, bad ym na ka bynta kano kano ka jingthmu niam.
Ha ka jingleit jngoh jong ki nongthoh khubor ia ka jaka pule jong ka USTM, u Hogue u la pyni ia ki rukom pyntuid um bad lum um jong ka skulbah. U la pynpaw ba ka jaka pule ka don ïa ki nala pyntuid um kiba biang kiba la shna khnang ban pynïaid bha ïa ka um slap, ha kaba ka um ka neh shibun hapoh ka jaka jong ka jaka pule.
U Hogue u la kynthoh ïa ki jingkynnoh jong u Sarma kum ki bym don nongrim, da kaba pynpaw ba ki rukom treikam jong ka skulbah kim don bynta ha ka jingeh jong ka jingshlei um ha Guwahati.
U Chancellor u la kyntait ruh ia ka jingkynnoh jong u Myntri Rangbah ka jylla Assam u Himanta Biswa Sarma ba ka jingpom ia ki lum da ka USTM ka la wanrah ia ka jingshlei um ha Guwahati.
U Hogue u la ban jur ba ka USTM ka la lah ban pynkylla ia ki jaka ba syllen sha ki jaka ba jyrngam lyngba ki prokram thung dieng, haba nujor bad ki jaka shabar jong ka jaka pule ha kaba ka jingpom khyndew kaba jur bha ka la wanrah ia ka jingpynjot ia ka mariang.
“Ka jingitynnad ha ka campus jong ngi ka ieng ha ka jingïapher bak-ly-bak na ki jaka ba la syllen shabar ka campus kiba la shah ktah ha ka jingpom khyndew kaba jur bha,” u la ong.
Baroh arngut ki samla pule bad ki nonghikai ki la pynpaw ia ka jingkyrshan jong ki ia u Hogue, da kaba kyntait ba ki jingkynnoh jong u Sarma ki long kiba bakla. Ki la ïaroh ïa ki jingthmu jong ka USTM ban ïada ïa ka mariang, da kaba kdew ïa ka jingjyrngam jong ka campus.
