Ieng skhem ka KSU pyrshah ia ka jingtih Uranium | Dawa da ka Resolution na ka Sorkar

Kynnoh ba thmu ki MLA barim ban thied tad ia ki jaka ha Domiasiat ban lah tih Uranium

Shillong, Naitung 05: Ka Khasi Students’ Union (KSU) ka lanmaham da kaba tyngeh pyrshah ia ka jingtih Uranium ha Meghalaya, da kaba kynnoh ba ki don ki briew, kynthup ki MLA barim kiba leit sha ki nongshong shnong ha Domiasiat bad ki shnong marjan ban pynbor ia ki nong shong shnong ha ryngkat bad jingthmu ban thied iaki jaka haka dor kaba tad.

U president ka KSU u samla Raymond Kharjana haba kren ha ka jingialang haka shnong Domiasiat South West Khasi Hills u la ong ba ka seng kan pyrshah ia kano kano ka jingpyrshang ban pynim biang mat tih mawshun hapoh ka thain ne hapoh ka Jylla.

“Ngi kwah ban phah ia ka khubor sha ka Sorkar Jylla ba kane ka executive committee ba mynta jong ka Khasi Students’ Union kan ialeh pyrshah daka ba tyngeh ia ka jingtih Uranium ha Domiasiat bad kiwei kiwei ki jaka ba marjan,” la ong u samla Raymond.

U la ong ba ka KSU ka la ju ioh khubor ba ki briew kiba na shabar jong ka thain ki wan sha Domiasiat bad ki shnong ban pynim biang iaka mat tih Uranium.

“Ha kine ki ar sngi ba la dep ngi la iohsngew ia ki khubor ba ki briew ki wan sha kane ka jaka bad ki pyrshang ban pynsngewthuh ia ki paidbah ban shim ia ka rai jong ki daka ba ai jingkyrshan ia ka jingtih uranium,” u la ong.

“Kane ka dei ka khubor kaba shai sha baroh kito ki briew ba ka KSU kan shu sngap lane kan nym shong khli kti halor kane ka mat bad kan ialeh pyrshah daka ba tyngeh tad haduh ban da pynduh noh shi syndon ia ka mat tih Uranium hapoh ka Jylla.”

U samla Raymond u la kynnoh ba ki nongmihkhmat paidbah ki don eiei sha lyndet jong ka jingkwah thied jaka ki briew na shabar ka thain hapoh ka shnong Domiasiat bad ki shnong marjan.

“Ngi la iohsngew na ki paidbah bad ki la pyntip sha ngi ba ki don ki briew, kiba kham bun kidei ki MLA, kiba la wan sha kane ka thain bad ki shnong ba marjan bad ki la pyrshang ban pynsngewthuh ia ki briew ban ai ka jingmynjur ban tih Uranium ha kane ka thain. Ha kajuh ka por, ki thied jaka ha ka dor kaba tad” u la ong.

“Kumta, kane kam dei ka jaka jngohkai pyrthei, bad kam dei ruh ka jaka kaba don u dewiong ne u mawshun. Ka jingkylli jong ngi ka long: kaei ka jingthmu ban thied jaka ha kane ka thaiñ. Ngi tip, ka jingthmu ban thied jaka hangne ka long ba ia kane ka jaka la thied ban die ha ka dor kaba rem sha kiwei pat ki tnat na ka bynta ka jingtih uranium ha ki sngi bad snem ban wan. Ka KSU ka la dep ban iakynduh ia u Myntri Rangbah rangbah ka Jylla halor kane ka mat” u la bynrap.

“Ngi la rah ia kane ka mat sha u Myntri Rangbah ka Jylla ha ka 1 tarik Naitung bad ha ka jingialang ngi la dawa ban mynjur daka Resolution hapoh ka iingdorbar thaw ain ban pyrshah ia ka jingtih uranium ha kane ka thain,” ula ong.

“Kaba nyngkong ka long ba ka Sorkar ka dei ban pyni ia ka jingsngewkhia jong ka ha kaba iadei bad kane ka kam da kaba mynjur daka Resolution hapoh ka iingdorbar thaw ain. Ngin pyrshang ruh ban pynbor ia baroh ki District Council ban mynjur daka Resolution ha kaba iadei bad kane ka mat”.

U la ong ba ka CEC jong ka KSU kan sa shong pyrkhat halor kane ka mat hadien ba ka Sorkar bad ki District Council ki la jubab iaka jingdawa jong ka seng.

“Kumba ka long mynta, ngi dang pynbor ia ka Sorkar bad ia baroh ki District Council ban mynjur daka Resolution bad na ka bynta ki sienjam kiba shakhmat, ka CEC kan shong bad iakren”.

U general secretary ka KSU u samla Reuben Najiar u la ong ba ka jingma ioh im biang ka jingthmu tih Uranium ka wan namar dangshen ka Sorkar Pdeng ka la mynjur iaka Office Memorandum ban pyllait ia u uranium bad u thorium na ki jingialap paidbah (Public Hearing).

Haba pyniadei bad ka Jaintia Hills, u la ong ba la thied bad die biang ia ki jaka sha ki Company sha katei ka District kaba la pynkhein ruh iaka Land Transfer Act.

“Kaei kaba ngi la iohi ha Jaintia Hills, ha kaba baroh ki karkhana dewbilat ki don, ka long ba ki briew ha kito ki jaka ki thied jaka bad nangta ki die noh sha ki Company bapher bapher. Ki la don ruh ka jingpynkhein iaka Land Transfer Act ha kane ka bynta. Hynrei ka sobjek ha kaba kut ka shong ha ka Sorkar, ban ai jingbit ka shong haka Sorkar,” la ong u samla Ruben.

“Bad haba iadei bad u uranium, ngi la iohi ba ka tnat Ministry of Forest and Environment ka Sorkar Pdeng ka la pynmih ia ka Office Memorandum kaba ong ba ia ki marpoh khyndew kum u uranium bad u thorium yn pyllait naka jingdonkam ban pan jingbit naki trai shnong ne naka jingialap paidbah (Public Hearing). Ka Sorkar India, da kaba kdew ia ki daw jong ka jingshngain ka ri, kan lah ban tih ia u uranium bad thorium khlem da donkam ban pan jingbit ba ki trai shnong bad khlem da donkam ka jingialap paidbah” u la bynrap.

U samla Ruben u la kynnoh ba ki MLA barim bad kiwei kiwei kiba don haka bor bad kiba don jingiadei bad ka Sorkar ki la pyrshang ban ioh jaka ha Domiasiat. U la ong ba ka KSU ka dang lum ia ki jingtip ba thikna daka ba pan jingtip lyngba RTI shwa ban sei paidbah ia ki kyrteng.

“Ngi la ïohi ruh ba ki briew, kynthup ïa ki MLA barim, ngi tip mano ba dei hynrei ngim kwah ban jer kyrteng ïa ki kumba ka long mynta namar ngi dang lum jingtip lyngba ki RTI bapher ban ïoh ïa ka jubab kaba pura bad hadien ba ngi la biang iaki sakhi ngin sei paidbah iaki kyrteng, mano kita kiba la wan ban thied jaka ha kane ka thain” u la ong.

“Ki don ruh ki briew kiba don bynta bad Sorkar, bad ruh ki riew pawkhmat, kiba la wan shane bad pyrshang ban pynsngewthuh ia ki paidbah ban die noh ia ki jaka jong ki.” U la pynskhem ba ki nongshong shnong ki la kyntait ia ki jingtyrwa tih Uranium kumba kila kyntait naduh ki por mynshwa bad haduh mynta ki dang iai bteng ban kyntait.

“Kaei kaba ngi la iohi ka long ba ki paidbah ka Domiasiat, naduh ba sdang ka mat tih Uranium, ki ju pynpaw ba kin nym shah ia ka UCIL ban tih ia u uranium. Wat mynta ruh, haba kiwei pat ki riew pawkhmat jong ka Jylla ne ki riew pawkhmat jong ka Sorkar Pdeng, ki wan shane ban pynkohnguh ia ki, ka jubab jong ki, ka long kaba shai bha, kin nym shah” ula ong.

“Kaei kaba ngi sngewthuh mynta ka long ba ki pyrshang ban phah thied iaki jaka haki trai shnong. Hadien ba kila ioh thied kin kylla trai jaka bad kin sa lah ban die kylla iaki jaka. Ba mynta namar la pynduh iaka jingdonkam ban pynlong jingialap paidbah (Public Hearing) kan pynsuk iaki ban pynim biang iaka jingthmu tih Uranium”.

Hashuwa ka jingialang ki nongialam bad dkhot ka KSU kila leit buh syntiew ha u lum jingtep jong i Meiieid Spility Lyngdoh Langrin uba don ha Domiasiat South West Khasi Hills.