Shillong, Naitung 30 : U Lamphang ka Iingdorbar Thaw Ain Thomas A Sangma ula pynthikna ba ka jingpyniasoh u MLA ka Mylliem Bah Ronnie V Lyngdoh sha ka National People’s Party (NPP) ka dei kaba ieng nongrim (valid) kat kum ki kyndon jong ka 10th Schedule ka Riti Synshar ka Ri.
“Nga la iohpdiang ia ka shithi iehnohkam bad ka jingkwah jong u ban iasoh sha ka NPP. Da ka jingiarap ki nongaibuit ha ka kam ain bad ki nongtrei jong nga, ngi shem ba ka aplikeshon ka dei kaba ieng nongrim kat kum ki kyndon ka 10th Schedule ka Riti Synshar ka Ri” ong u Lamphang.
“Namar kata, nga la pdiang ia kane ka aplikeshon jong u. U Bah Ronnie ula dei u dkhot ka National People’s Party (NPP) naduh mynta ka sngi” ula bynrap.
U Lamphang ula ban jur pat ba lada don kano kano ka jingpyrshah, lada don, ki lah ban iaid da ka lynti ka riti synshar paidbah hynrei pynshai pat ba ka rai jong u hi kan ieng.
Ha kajuh ka por, u Lamphang ula pyntip ba u Bah Ronnie ula weng noh ia ka mukotduma na ka Iingkashari Meghalaya High Court. “Ha ka shithi, ula pynpaw shai ba um kwah shuh ban nang pyniaid shakhmat ia ka PIL” ong u Lamphang.
Lah ban kdew hangne ba ha u Nailur 2024, u Bah Ronnie ula ai ia artylli ki shithi dawa mait kyrteng ia ka jinglong MLA sha u Lamphang kaba long pyrshah ia ki 3 ngut ki MLA ka Congress-u Dr Celestine Lyngdoh, Bah Charles Marngar bad Gabriel Wahlang namar ka jingleit iasoh sha ka NPP.
U Bah Ronnie haba iakren bad ki nongthoh khubor ula ong “Nga la leit pyniasoh sha ka NPP khlem kano kano ka jingbuh kyndon. Kawei ka jingkyrpad jong nga ia u Myntri Rangbah ka long ban pynthikna ia ka jingskhem bad ka roi ka par na ka bynta ki paidbah”.
Haba batai ia ka jingthmu jong u, u Bah Ronnie ula ong ba dei ka jingkwah jong ki paidbah ba un leit iasoh noh sha ka seng sain pyrthei kaba synshar ia ka Jylla.
“Kam dei ka jingkwah jong nga shimet. Ki briew kila kyrpad ia nga naduh u 2018. Nga la iai sah bad ka Congress naba nga la shah jied na ka ticket ka congress. Hynrei mynta, ba la palat mar shiteng ka samoi kala iaid, ki nongkyrshan jong nga ki ngeit ba la dei ka por ban buh hakhmat ia ka jingskhem bad ka roi ka par”.
Halor ka jingkylli, u Bah Ronnie ula kdat sharud ia ki jingmutdur ba kan mih ka kynrum kynram hapdeng jong u bad u MLA barim bad nongialam ka NPP Bah Hamletson Dohling.
“Nga la shah jied ha ki paidbah. U bah Hamlet u dei u MLA barim. Ngi baroh arngut ngi la kut jingmut ban iatreilang n aka bynta ka constituency” ula ong.
Haba kylli ba mano ban long ki kyrtong ka NPP na Mylliem ha ka elekshon ban wan, u Bah Ronnie ula jubab da kaba ong “Ngin sa rai ynda la poi ka por. Ynda ngi la jam ia kata ka jingkieng”.
 ka dei kaba ieng nongrim (valid) kat kum ki kyndon jong ka 10th Schedule ka Riti Synshar ka Ri.){kind=link}