Dawa weng kam u nongtrei paidbah
Shillong, Nohprah 08 : Uwei u nongtrei kam paidbah ula dawa ban weng kam noh ia u Headmaster ka Mon Rongsna Govt LP School ha South Garo Hills, haba kynnoh ba ula khein sting ia ka kam naduh u snem 2015 kaba lam sha ka jingiehskul noh shiteng por haduh 20 ngut ki Khynnah.
U Greneth M Sangma ula thoh sha u Sub Divisional School Education Officer ka South Garo Hills, ba dawa ban leh eiei pyrshah ia une u Headmaster Headring M Marak.
“Ula kheinsting iala ka jong ka kamram, jah klep na skul bad ula shu shim tang ia ka tulop da ki phew snem” ong u Sangma ha ka shithi.
Kat kum ka jingong jong u, kila don bun ki jingujor pyrshah ia u Marak bad kila don ruh ki jingpan RTI bad ka jingweng kam shipor hynrei hadien bala thungkam biang ia u, kane ka jingleh jong u kam shym la kylla satia.
Ka Managing School Committee, ki paidbah bad ki nongialam shnong kila pynthikna ba u Marak u khlem wan sha skul naduh u snem 2015 haduh 2025 hynrei ula ioh beit ia ka tulop watla u jah klep.
“Ka Managing Committee kala ai bun ki jingujor bad kim sngewtynnad ruh ia ka jingbym leh eiei pyrshah ia u Headring M Marak” ong u Sangma haba bynrap “Kane ka jingkhein sting jong u ia ka kam kala lam sha ka jingpep skul shiteng por haduh 20 ngut ki Khynnah”.
U Sangma ula dawa ba dei ban beh kam syndon ia u Marak bad ban thung noh ia ki nonghikai kiba biang kyrdan ha kane ka kam, ban leh eiei pyrshah ia u Sub Inspector of school namar ka jingbym trei ia ka kam bad jingbam sap bad ban pynlong ruh ia ka jingtohkit kaba bniah ia kane ka jyrsieh.
