Shillong, Nohprah 16 : U Pro Vice-Chancellor ka North-Eastern Hill University (NEHU) Prof S Umdor, ula buh ia ka shithi iehnoh kam, ka ban treikam naduh ka janmiet 15 tarik Nohprah.
Kane ka rai kala wan hapdeng ka jingkynrum kynram ka rukom pyniaid kam hapoh ka skulbah, kaba la wan jia na ka jing bym don ki Ophisar ba donkam ban don bad ka jingpyrshah na ka seng ki samla pule bad ki nongtrei.
Ha ka kyrwoh, u Prof Umdor ula pynpaw ia ka jingsngewnguh ia baroh halor ka jingai ia ka jingiatreilang bad ka jingkyrshan, haba kyrmen skhem ia ka jingwanrah biang ia ka jingtreikam kaba iaid beit iaid ryntih bad ka jingkiew shakhmat jong ka NEHU.
“Haba khmih ia ka jinglong jingman ba mynta-bad ka jingbym don ki nongkyrshan ba donkam bad ki jinglong jingman bym thikna haba phai sha ki rai ba kongsan jong ka skulbah-nga sngew ba ka jingbteng ban shong ha ka shuki kan ym wanrah ia ka jingmyntoi jong ka skulbah lane ban lah bat ia ka jingtreikam kaba khuid bad ba kynsai kumba la khmih lynti na ka kyrdan” ula ong.
Kane ka jingiehnohkam kala wan hadien ki jingjop kiba khraw kynthup ia jinglah pyniaid beit ia ki end-semester exam, pyndep ia ka jingkyntiew kyrdan ia ki nonghikai, jinglah pynlong ia ki National bad International Academic program kum ka Smart India Hackathon 2025.
Hynrei, ka University kala mad ia kiba bun ki jingtynjuh, kynthup ka jingshah khate ba 42% ha ka UGC recurring grant bad ka jingpyrshah na ki samla pule bad ki nonghikai halor ka jingpyrshang ban pynlong ia ka jingialang ka Executive Council khlem ka jingdon ki briew/nongmihkhmat ba donkam.
Ka NEHU Students’ Union, NEHU Teachers’ Association, bad kiwei ki seng kila dawa ia ka jingiehnohkam u Prof Umdor haba kdew ia ka jingdkoh ka rukom treikam ka skulbah bad ka jingbym lah ban leh eiei ia ki mat kiba kongsan.
 Prof S Umdor, ula buh ia ka shithi iehnoh kam, ka ban treikam naduh ka janmiet 15 tarik Nohprah.){kind=link}