Shillong, Nailur 06: U MLA bad Myntri Sorkar barim ka Jylla Bah J.A. Lyngdoh ula ai ia ka shithi iehnohkam hynne ka sngi ba-ar kum u dkhot ka Bharatiya Janata Party (BJP)-Meghalaya haba pynpaw ba kane ka sienjam ba ula shim ka dei namar ka jingshah kyntait bad shah niew bein ha ki Nongialam ka Party na ka por sha ka por.
U Bah JA Lyngdoh ba ju tip kum u Bah Dip, ula long MLA la bunsien na Mawphlang Constituency bad bat ruh ia ki shuki Myntri Sorkar la bun snem. U la iasoh sha ka BJP ha u snem 2016 bad ula mih aireng ha ka elekshon MLA-2018 na North Shillong Constituency bad shah rem.
Une u Nongthaw ain barim ka Jylla ula aiti ia ka shithi iehnohkam ha u President ka BJP-Meghalaya Bah Ernest Mawrie.
Kat kum kane ka shithi iehkam, u Bah Dip ula pyntip ba naduh ba u iasoh bad ka BJP ula trei borbah ban kyntiew ia ka party ha Jylla bad u dei ruh uba don bynta ha ka jingwanrah ia ki saw ngut ki MLA ban iakhun ia ka elekshon MLA-2018 na ka BJP kat kum ka jingbhah kam jong u Nalin Kohli bad u Ram Madhav.
Kine ki saw ngut ki MLA ki kynthup ia u Bah Sanbor Shullai, Bah A.L Hek, u Bah Robinus Syngkon bad u Bah Justine Dkhar.
“Hynrei da ki jingjia ba dang shen bad dang ha kine ki khyndiat sngi kala pynlong ia nga ban thoh ia kane ka shithi iehnohkam” ula ong.
U Bah Dip ula ong “Hapoh ka jingialam jong phi (Bah Ernest) kum u President ka Party , nga sngew ba nga la shah shet kylla. Kane kala paw na ka jingkyrshan jong phi ia uwei pat u para dkhot Bah Rocky Hek kum u kyrtong ka North Shillong hadien ba nga shahrem”.
“Nga la pyrshang ban ioh iashong jingialang bad iakren bad phi hynrei kam ju longkam satia. Wat hadien ba u Bah Rocky Hek ula iehnohkam mynta u snem, nga la pyrshang ban ioh iashong jingialang biang hynrei kam shym la urlong” ula bynrap.
U Bah Dip ula pynpaw “Kaei kaba pynsngewsih bad pynmong ia ka jingieid jong nga ia ka party, ka long ba phi (Bah Ernest) bad katto katne ki dkhot kila pynpaw ia ka jingkyrteng u Bah Martamlin Pyrbot kum u Kyrtong ban aireng na ka North Shillong Constituency bad la pynwai noh ruh wat ia ka North Mandal Committee ba nga la thaw”.
