Shillong, K’Lyngkot 18: Ki 5 ngut ki dkhot jong ka Ïingdorbar Thawaiñ ka jylla Meghalaya hynne ka sngi kila aiti iaka shithi ieh noh kam kum ki MLA ha u Lamphang ka ing dorbar u bah Metbah Lyngdoh.
Kine ki 5 ngut ki MLA ki kynthup u MLA ka HSPDP na Mawkyrwat konstitwensi u bah Renikton Lyngdoh Tongkhar, u MLA na Nongkrem u bah Lambor Malngiang, ki MLA ba la shah Sospon ha ka Congress u bah PT Sawkmie na Mawlai bad u Bah Mayralborn Syiem na Nongpoh, bad u MLA ka AITC na Sutnga Saipung konstitwensi u bah Shitlang Pale.
Ka jingieh noh kam kine ki 5 ngut ki MLA ka long kum shi bynta ban pyniasoh noh ialade sha ka United Democratic Party (UDP) naka bynta ban iakhun ha kane ka ilekshon ban wan.
Naka liang ka UDP kala pynkhreh ban pdiang ia kine ki 5 ngut ki MLA ba la ieh noh kam mynta ka sngi ha ka por 1 baje nohphai sngi.
La iathuh ruh ba ka UDP mynta ka sngi kan pynbna noh iaka thup ba ar (Second List) jong ki kyrtong ki ban iakhun ha kane ka ilekshon ban wan.
