Shillong, K’lyngkot 18 : Ka Bishop House, New Nongstoin, West Khasi Hills kala kyntait ban ai jingithuh ia ka “Jingpynkyntang Lyngdoh” ha ka shnong Langniuh, Eastern West Khasi Hills, haba pynpaw ba uto uba phrung dur kum u Bishop ba pynkyntang, um dei satia u Bishop jong ka Balang Catholic.
Kat kum ka kyrwoh na u Rev Fr Anselm Nonglang, Diocesan Administrator ka Nongstoin Diocese la pyntip ba ki don ki riew shim kabu kiba kam ialade kum ki Bishop bad kila leit ban pynkyntang Lyngdoh ha kane ka Shnong. Ula pyntip baka Balang Katholik kam don jingtip eiei halor kane ka jingpynkyntang.
“Ka Long kaba sngewsih ban tip ba ha kine ki sngi, kala don ki dak jong ka “jingialeh pyrshah ia ka Jingngeit Katholik” da ki katto katne ki Khun Khristan Katholik ha kane ka Jylla Niam Nongstoin. Ka Jylla Niam Nongstoin ka pynrem jur ka pynrem jur halor kine ki jingjia ba shyrkhei ban pyrshah jingngeit Katholic; khamtam da kito kiba shu leh mynleh bad kiba kam ialade ba ki dei ki Bishop bad kiba la shim kabu ban pynkyntang Lyngdoh, kumba leh ha ka Balang Katholik jong ngi” ong ka kyrwoh.
“Ka Balang Katholik Nongstoin kam don jingtip eiei shaphang ka “Jingpynkyntang Lyngdoh” hapoh ka Shnong Langniuh (hajan Mawtikhar bad Rikhen). Uto uba pyrshang leh bad phrung dur kum u Bishop, um dei u Bishop jong ka Balang Katholik” ula bynrap.
Kat kum ka jingong jong u, katei ka jingjia ka dei ka jingialeh pyrshah ia ka Balang Katholik haba bynrap “Ka Ain jong ka Balang Katholik Canon Law, Can 751, ka batai shai , ba ngi ialeh pyrshah ia ka Jingngeit ha ki lai rukom.
a. Herese : Ka dei ka jingkyntait khang lane ka jingartatien khang ia ka jingshisha ba ngi dei ban ngeit.
b. Apostacy : Ka dei ka jingiehnoh pura ia ka jingngeit Khristan.
c. Schism :Ka jingkyntait ban snoh ha ka bor pyniaid jong u Kpa Bakhuid lane ka jingialong kawei ki paid “Riewngeit” kiba shah synshar ha u.
U Rev Fr Anselm Nonglang ula kyntu ia ki para ba ngeit ba kin long kiba husiar ia ki “Nongialam Bakla” khamtam kito wan “Kum ki Suri Kup Snieh Langbrot”.
