Shillong, Nailur 28 : U Vice Chairman ka Hynniewtrep National Liberation Council (HNLC) u Sufiyan A Hazarika ba ju tip ruh kum u Manbhalang Jyrwa, ula iehnohkam kum u Dkhot ka Seng.
Ia kane la pyntip da u General Secretary-cum-Publicity Secretary ka HNLC Bah Sainkupar Nongtraw ha ka kyrwoh bala phah mynta ka sngi sha ki lad pathai khubor.
“Ngi sngewkmen ban pyntip sha phi ba u Sufiyan A Hazarika ba ju iatip kum u Manbhalang Jyrwa, ula aiti ia ka shithi iehnohkam, ia kaba ngi la pdiang da ka jingsngew iatip lem para briew” ong u Bah Sainkupar.
U pyntip ba ka Central Executive Committee (CEC) kaa thung ia u Bah Teimiki Laloo kum u Vice Chairman ka Seng na ka bynta hynriew bnai.
Haba pynpaw ba ka jingiehnohkam jong u Bah Manbhalang kan ym don jingktah lane khein troin noh ia ka bor bad ki nongrim ba ieng da ka seng, u Bah Sainkupar ula ong “Ki Nongrim jong kin kin iai neh khlem jingkylla kampher ia ka jingkylla ha ki nongialam”.
“Ngi kyrmen ba ki paid ka Bri u Hynniewtrep kan iai bteng ban niew burom ia u Bah Manbhalang Jyrwa kum u para briew” ula ong.
Haba kyntu ia ka Sorkar Jylla ba kan kiar na ka jingshim kabu ia ka jingiehnoh kam u Bah Manbhalang, u Bah Sainkupar ula ong ba ka dei ban shimkhia hakhmat eh ia ka jingiakren iasuk.
“Ka long kongsan ban shim ba ka jingiehnoh kam u Bah Manbhalang kam dei ban pynthut ne ktah ia ka jingiaid ka jingiakren iasuk. Haba jam shakhmat, u Nongialam jong ka Kynhun ban lamkhmat sha ka miej iakren iasuk yn long noh da u Vice Chairman ba dang shu thung thymmai” ula ong.
