Shillong, Nailur 06 : U MLA barim ka Mawsynram Bah Himalaya M Shangpliang, ula aiti ia ka shithi iehnohkam kum u Nongialam ka Bharatiya Janata Party (BJP)-Meghalaya hynne ka sngi Balang haba aidaw ba jur ka jingleh shiliang jong ki Nongialam hapoh ka jingialam u President.
U Bah Himalaya ula aiti ia kane ka shithi iehnohkam ha u President ka BJP-Meghalaya Bah Ernest Mawrie.
Lah ban kdew hangne ba dang shen, ki khubor kila mih ba u Bah Himalaya ula don jingthmu ban leit pyniasoh noh ialade sha ka National People’s party (NPP) bad ban pan ticket ruh ha kaban iakhun kum u kyrtong sha ka elekshon MP-Lok Sabha ka ban long ha u snem 2024.
U Bah Himalaya ula pyniasoh ialade sha ka BJP ha u bnai Naiwieng 2022 hadien ka jingphet noh na ka Congress bad ka All India Trinamool Congress (AITC), ban iakhun ia ka eleskhon MLA-2023 na Mawsynram.
Ha kane ka shithi iehnohkam, u Bah Himalaya ula pyntip ba naduh ba u rem ia ka elekshon, ula rai ban iai neh bad ka party bad ban trei na ka bynta ka jingkhlain bad jingkiew shaphrang jong ka party.
Ula pyntip ba hadien ba ula shah thung kum u Nongaiktien ka party, ula kren ia shibun ki ishu sha ki lad pathai khubor na ka bynta ka party bad shim ruh ia ka bynta ka kongsan na ka bynta ka party kum u dkhot jong ki Seng sain pyrthei, kiba iakren ia ka Reservation Policy.
Une u MLA barim ula ong ruh, ki don shibun ki ishu kiba kongsan, kiba u la ju kren bunsien sha u President (Bah Ernest) na ka bynta ban pynkhlain ia ka party ha Meghalaya khamtam ha ki jaka nongkyndong bad la ai jingmut ruh ia ki sienjam ba dei ban shim, haba buh hakhmat ia kaei kaba ka party ka mad ha ka elekshon ba dang shu dep (MLA-2023).
“Nga la pynkynmaw la bunsien ia u President halor ki sienjam ba donkam bala tyrwa ban shim ha kaban pynkhlain ia ka party ha ki kyrdan bapher bapher halor ka jingiohi ia ki jingiashrut kiba mih hapoh ka party ha Jylla” ula ong.
Hynrei namar kine kiei kiei, u ong “ Nga kwah ban kdew ba nga dang kwah ban iai neh bad shakri ia ka party naduh ka mynsiem , nga sngewthuh ba katba ka dang don ka jingleh shiliang ne pyrkhat tang ia ki bahaiing hasem ne paralok (nepotism) jong ki nongialam ha ki kyrdan bapher bapher kiba don hapoh ka jingialam u President ka State BJP, kan pyndkoh lut ia baroh ki sienjam ba lah ban shim jong ki Nongtrei ka party kiba kitkhia ia ka kam ha kaban pyndonkam laitluid iala ka jabieng bad ban kiew ha ka party”.
“Namar kata, nga buh ia kane ka shithi iehnohkam kum u Primary Member jong ka BJP ha Jylla Meghalaya naduh mynta halor ki daw shimet” ula pynkut.
