Shillong, Risaw 28 : U Symbud Myntri Rangbah ka Jylla ba khmih ia ka Tnad Bording Bah Prestone Tynsong hynne ka sngi thohdieng ula iathuh ba ka Sorkar kala ieh ha ka jingstad jong ka Meghalaya Energy Corporation Limited (MeECL) haba iadei bad ka jingdawa thungkam pura noh ia ki nongtrei Contract.
Ka MeECL Progressive Workers’ Union (MePWU) kala khot pynlong ia bun jait ki jingiakhih ba dawa ia ki bor pyniaid ka MeECL ba kan thaw ia ka Policy ha ka ban thungkam pura noh ia ki nongtrei Casual/Contract.
“Nga la bthah ia u Chairman-cum- Managing Director (CMD) ka MeECL ban khot ia ka jingialang halor kane ka kam bad ban iakren markhmat b aka MePWU” ong u Bah Prestone haba iakren bad ki nongthoh khubor.
Haba pynpaw baka MeECL kala treikam hapdeng ka jingduhnong manla u snem, u Symbud Myntri Rangbah ula ong ba ka Corporation ka don ia ka jingsahram ba kot haduh T. 2500 klur bad ka lah ban kot ruh sha ka T. 3000 klur.
“Namar kata, ngi sngewthuh ba ki kwah ban thungkam pura hynrei ha kajuh ka por ki dei ruh ban sngewthuh ia ka jinglong jingman ka pla tyngka jong ka Corporation naba kane ka dei ka Tnad treikam ban pynmih pisa” ula ong.
Haba pynpaw ba ka Sorkar kam don eiei ban ong halor kane ka kam, u Bah Prestone ula ong “Lad aka Corporation ka treikam bha, lada ka iohnong, lada ka jingiohnong ka bun bad ka jingduhnong ka duna, lehse ki lah ban shim ia ka rai ha ka kyrdan jong ki (Board). Lehse katto katne percent ki nongtrei lah ban thungkam pura noh…ia kane ngi ieh ha ka jingstad jong ka Corporation”.
Ha ka 15 tarik Risaw, u Bah Prestone ha ka Dorbar Synrai jong ka Iingdorbar Thaw Ainu la kular ba ka Sorkar kan sa shim ia ki sienjam ha kaban shong pyrkhat ia ki jingdawa jong ki nongtrei casual ban thungkam pura noh kat kum ka ain.
