Shillong, Jylliew 12 : U Raja Raghuvanshi bad ka kurim ka Sonam, kila ieh ia ka suiltcase ha ka homestay ha Sohra hashuwa ba kin jah rngai, lem bad u ‘mangalsutra’ bad ka sati bala thep hapoh jong ka, kaba la iarap ia ki kynhun tohkit ban iohksai ia ka jingshah pyniap u Raja Raghuvanshi, ong ka Director General of Police (DGP) I Nongrang haka sngi Balang.
Ka Sonam (25) bad u Raja (29) kila iathoh shong kurim ha ka 11 tarik Jymmang bad kila wan poi sha Meghalaya ha ka 20 tarik Jymmang ban wan leh honeymoon. Baroh kine ki shikurim kila jah rngai ha ka 23 tarik ha Sohra, tang da ki kynta ba ki mih na ka homestay ha ka shnong Nongriat.
Ia ka met u Raja la ioh tam na ka riat bah ba marjan ka kshaid Wei Sawdong ha ka 2 tarik Jylliew. Ka jingwad ia ka Sonam kala bteng tad haduh ka jingmih pyrthei biang jong ka ha Ghazipur, Uttar Pradesh ha ka step phyrnap jong ka 9 tarik Jylliew bad pyndem ialade hadien ba ki Pulit kila kem ia u samla jong ka Raj Kushwaha bad 3 ngut ki runar pyniap briew ba ka Sonam ka thong ban pyniap ia u Raja.
“Ngi la lap ia u ‘magnalsutra’ bad ka sati jong ka Sonam na ka suitcase jong kine ki shikurim bala ieh ha ka homestay ha Sohra. Ka briew kaba la iathoh bad ieh shadien ia u jingdeng ula kordor tam ia ka, kala aiksai iangi ban buddien ia ka kum ka nongshah suba ha kane ka jingjia” ong ka DGP.
U ‘mangalsutra’ u dei u jingdeng ba kyntang ba ju deng da ki kynthei hindu bala dep iathoh, kaba pyni ia ka jingiadei jong ka bad la u kurim.
Kine ki shijur kila leit rung ha ka homestay ha Sohra ha ka 22 tarik Jymmang khlem da buh lypa ia ka kamra, ong uwei pat u heh pulit, uba don bynta ha ka jingtohkit.
Kim shym la ioh kamra ha kane ka homestay bad kumta kila rai ban ieh ia ka suitcase ha kane ka homestay namar kan pynshitom ia ki ban rah lang ha ka jingleit hiar ia palat 3000 tylli ki mawkyndon sha ka shnong Nongriat, ban leit peitkai ia ka jingkieng diengjri, ula ong.
Une u Ophisar u pyntip ba kine ki briew bala kem baroh, kia kubur ba kila donkti ban pyniap ia u Raja bad da baroh ki sakhi satar bala iohlum, kam don jaka shuh ia ki ba kin nang kyntait”.
Ka Iingkashari ha Shillong kala phah ia ka Sonam, u samla jong ka, u Raj Kushwaha bad ia 3 ngut ki nongpyniap sha ka police custody ba 8 sngi.
 I Nongrang haka sngi Balang.){kind=link}