Shillong, Rymphang 06 : U Myntri ka tnad Bording Abu Taher Mondal ha ka sngi Ba-ar, ula pyntip ba ka jingioh jaka ka dei ka jingeh ban pyntrei ia ka Pumped Hydro Storage Project hapoh ka Jylla .
Haba iakren bad ki nongthoh khubor, u Mondal ula ong “Ka jingioh jaka ka dei ka jingeh . Namar kata, ngin sa iakynduh ia ki briew bad ngin sa buddien ia ka kam. Ngin phaikhmat mynta sha ki jaka bym don ba shong briew mano manor uh”.
Ka National Thermal Power Corporation (NTPC) kala phah ia ka pre-feasibility report sha ka Tnad bording halor ka jingwad bniah ba kala leh ha kawei ka jaka ban pyntrei ia ka pumped hydro storage projects.
“Ngi la aiti ia saw tylli ki jaka bala ithuh ban pynlong ia ka jingwad bniah. Ka Diengsong ha East Khasi Hills District ka dei kawei na ki jaka bala ithuh ban pyntrei ia ka PHPs” ula ong.
Haba kylli, u Mondal ula ong “Ngi dang bishar ia baroh ki kaiphod bala ioh pdiang namar kan shong ruh ba ha kano ka rukom ngin lah ban pyntrei ia ki PHPs namar kane ka donkam ruh ia bun bah ka pisa. Ngi dang wad ia ki lad ki lynti mynta”.
U pyntip ba watla ka tnad kala ithuh ia saw tylli ki jaka ban buh ia ki PHPs hynrei kan shong pat ha ka jingioh ia ka jaka.
“Baroh ki PHPs ki donkam bun ka jaka namar kawei ka dam kan don ha ka wah bad kawei pat ka don kan don sha ki jaka lum ha kaba ia ka um yn shu pump ha ki kynta ba jur ka jingdawa bording bad ia ka bording yn pynmih na ka dam ba shalor lum ha kine ki kynta ba jur ka jingdawa” ula ong bad bynrap “Ha ka jingshisha ia ki PHPs la ju pyndonkam tang ha ka por ba jur ka jingdawa kata ha ka por mynstep naduh 6 haduh 11 baje bad janmiet 6 baje haduh 11 baje mynmiet”.
