Shillong, Iaiong 25: Ban wanrah ia ka jingiadei kaba iajan hapdeng ka ri India – France bad ka jylla Meghalaya na ka bynta ban kyntiew ia ki kam ialehkai, ka Sorkar Jylla hynne ka sngi Palei, kala pynlong iaka jingialang bad ki Heh ka France ha Secretariat , Shillong, ban iamir jingmut halor katei ka phang.
Ha katei ka jingialang la iadonlang u Samuel Bouchard, Chargé de mission / Cooperation officer, Consulate General of France, Kolkata bad u Dr Vijay Kumar D u Commissioner jong ka tnad Sports ka jylla Meghalaya, u Bah John F Kharshiing u Working President ka Meghalaya State Olympic Association bad u Lanu Ignatius, Adviser Sports.
Kane ka jngiatreilang ka dei ha kiba bun ki liang na ka bynta ban ai jinghikai ha ka kam ialehkai, Coaching, Talent Identification, Sports Tourism bad ban pyniaid shakhmat ia kiwei kiwei ki kam kiba la iatreilang baroh shikatta.
Ka jingiakren bad u Samuel Bouchard kala long kaba seisoh haba ki heh ka ri France kila pynpaw ia ka jingthrang ban iatreilang ha kiba bun ki liang ha kaba iadei bad Talent Identification, Training Coaching ha ki katto katne ki jingialehkai kum ka Athletics, Archery, Aquatics, Basketball Badminton, Boxing, Judo, Football, Gymnastics, Shooting, Weightlifting bad kiwei pat ki jait jingialehkai na ka bynta ban pynkhreh ia ka National Games kaban pynlong da ka Meghalaya ha u 2026.
Ha ka jingialang la iatai ruh ia ka lad ban phah ia ka kynhun jongka Meghalaya State Olympic Association bad ka Department of Sports ban leit jurip ha ka ri France na ka bynta ban iatai sani shuh shuh na ka bynta ban iatreilang ha ki katto katne jait ki jingialehkai bad ka ri France.
Ki heh na ri France kila ai jingbatai ruh shaphang ka jingiaid shakhmat jongka Talent Identification, Elite bad Super Elite Program kiba la pyntreikam da ka MSOA /DSYA bad u Ian Campbell, ha kaba ki heh ka ri France kila pynpaw iaka jingdon jingthmu ban kyrshan ia kane ka prokram ban plie lad ia ka jylla ban don ia ka jingkylla khamtam eh ha ki skul kiba don ha nongkyndong.
Ka jingialang kala mynjur ruh ban pynkhreh ia ka Draft Framework jong ka jingthmu jong ka jingiatreilang halor ka kam ialehkai bad ban aiti ia katei sha ka sorkar Meghalaya na ka bynta ban iakren sani bad ki heh ophisar na ka ri France.
