Ha rynsan ka All India Presiding Officers Conference ba 84
Shillong, K’lyngkot 28 : U Lamphang ka Iingdorbar Thaw Ain ka Jylla Thomas A Sangma ula iathuh da ka jing sngew sarong ia ka jingdon akor bad ka burom jong ki Nongthaw Ain ka Jylla ha man ba pynlong ia ki Dorbar jong ka Iingdorbar Thaw Ain ka Jylla.
U Lamphang ula kren ia kane haba iashimbynta ban ai jingkren ha ka 84th All India Presiding Officers Conference (AIPOC) kaba long ha Maharashtra Legislative Assembly, Mumbai.
Ia kane ka conference la plie da u Lamphang ka Lok Sabha Om Birla bad la ioh ruh ia ka jingkren na u Myntri Rangbah Duh ka Ri Narendra Modi lyngba ki kor online.
Ha kane ka conference ki Presiding Officer kila iakren halor ka mat (i) ban tei ia ka jingshaniah u paidbah ha ki Iingdorbar Thaw Ain-ka jingdonkam ban bat ia ka discipline bad ka burom ha Parliament ki Assembly ha ki Jylla bad UT bad (ii) kumno ban pynlong ia ka jingtreikam ki Committee kaba kham don jingmut bad ba trei bha.
Haba kren halor ka mat ban tei ia ka jingshaniah u paidbah ha ki Iingdorbar Thaw Ain-ka jingdonkam ban bat ia ka discipline bad ka burom ha Parliament bad Assembly, u Lamphang ula ban jur ia ka jingdonkam ki Dkhot ka Parliament bad Assembly ban bat ia ka akor, ka burom jong ka Iingdorbar da kaba kohnguh bad iaid kat kum ki rules bad jingpyniaid kam.
“Ban pynkulmar hapoh ka Iingdorbar kam pynitynnad satia hakhmat u paidbah. Ha kine ki sngi ba mynta, ngi la iohi ia ki dkhot ba ki iatur sha ka pung jong ka Iingdorbar, rah placard bad leh pyrshah ia ka hukum jong u Presiding Officer kaba dei ka kam ka bym itynnad bad ka bym iahap ruh kat kum ka synshar paidbah” ula ong.
Ula ai jingmut ia ki dkhot ba ki lah ban kren ia ki ishu jong ki ha ka lynti kaba dei bad ki lah ruh ban iakren ia ki jingeh ba ki don bad ki Presiding Officer shabar jong ka kamra.
“Hynrei sngewtynnad ba ki jingiatai bad jingiakren hapoh ka Meghalaya Legislative Assembly ka dei kaba ju pynlong beit ha ka lynti ba jai jai watla ki don ki jingiakhluit ha ki jingiatai hynrei ki dkhot ki ju bat beit ia ka burom jong ka Iing” ong u Thomas.
“Ngim pat ju mad ia kano kano ka khep ba ki dkhot ki pynhuri hura ne iatur sha ka pung jong ka Iingdorbar ha ryngkat ki placard lait noh tang ka jingiamih shabar jong ki dkhot haba kim hun ia kino kino ki ishu” ula bynrap.
U Lamphang ka Iingdorbar Thaw Ain ka Jylla ula pyntip ruh ba ki don ki khep ba u Presiding Officer u ju iakren hapoh kamram bad ki Nongialam na baroh ar liang-ka liang synshar bad liang pyrshah, da ka jingthmu ban pynbeit ia kino kino ki ishu ka ban pynhun lang ia baroh ki liang manla ba don bynta.
