Shillong, Nailar 21 : U National General Secretary ka NPP bad Symbud Myntri Rangbah ka Jylla Bah Sniawbhalang Dhar ula iathuh lypa (predict) ba ka Congress kaba don ha Liang Pyrshah, kan sa jah kyrteng noh shen ha Jylla Meghalaya.
Haba iakren bad ki nongthoh khubor ha ka sngi Balang, u Bah Sniawbha ula kren ia ka jingwan iasoh dang shen ki 3 ngut ki MLA ka Congress sha ka NPP bad ong “Ka paw kumba ka iaid shata (shen, ka Congress kan sa jah kyrteng na Meghalaya)”.
Kum u Nongialam barim ka Congress, u Bah Sniawbha ula ong ba ula shim rai ban mih noh na ka Congress ha u snem 2017 namar ka jingtip ba thikna ba kane ka party kan sa ngam noh.
“Balei ba nga iasoh noh sha ka NPP ka long namar ba nga tip ba ka Congress kan sa ngam bad ka jingantad jong nga ka dei kaba biang bha bad lehse nga la dei. Kumta ha u 2017-2018, nga la iasoh sha ka NPP namar nga tip ha katei ka por ba ka Congress kan sa ngam noh ha kano kano ka por” ula ong.
U Bah Sniawbha ula ong ba ki 3 ngut ki MLA ka Congress kila wan pyniasoh sha ka NPP ha ka por kaba biang bha.
Haba kylli, une u Nongialam ka NPP ula ong ba ka party jong u, ka long kaba kloi ban pdiang ia u President ka Congress bad MP barim ka Shillong bah Vincent H Pala sha ka sem jong ka. “Lada u (Pala) wan, ngi pdiang sngewbha ia u”.
Halor ki jingkynnoh u bah Pala ba ka NPP kala pyndonkam ia ki pisa beain ban beh thong ha kaban thied ia ki MLA ka Congress, u bah Sniawbha ula ong “Phi lah ban kylli nala ki jong ki MLA ka party, kiba la wan iasoh sha ngi. Ngam dei u briew uba dei ban kren halor kane. Ki MLA jong u, kila pynpaw shai kdar ha ka sngi ba ki wan iasoh ba ka rai jong ki ka dei eh halor ka roi ka par. U lah ban kynnoh hynrei ka jingshisha hi ka long b aka dei ka bym don nongrim”.
“Phi iohi, ki dei ki nongthaw ain, ki ieng na ka bynta ka roi ka par kumba kila pynpaw shai kdar ha ki lad pathai khubor” ula ong haba bynrap “Lehse kila iohi ia ka jingtreikam jong ka Sorkar ba ka dei kaba biang bha. Kane lehse ka dei kawei ka daw ba pynlong ia ki ban wan rung sha ka NPP”.
Ha kajuh ka por, u bah Sniawbha ula kubur ba ka Sorkar kam lah ban ai skhim palat sha baroh ki constituency hynreiula ong “Ngi la pyrshang kum ka Sorkar ban leh ia kaei kaba bha duh. Ym don kawei ruh ka constituency kaba ioh tam ia ka roi ka par hynrei kum ka Sorkar ngi la pyrshang ban ai kam pynroi ia baroh ki constituency”.
