Shillong, Risaw 14 : Ka Shillong Lajong Football Club ha ka sngi Nyngkong, kala pynbna ia ka jingiateh lok bad ka Royal Challenge Packaged Drinking Water, kawei na ki kompani kyiad, kum ka Co-Sponsor ne nongbei tyngka lang ha ka lympung ialehkai I-League ban wan.
Kane ka jingiatreilang ka dei ka kam kaba kongsan bha na ka bynta ka Shillong Lajong FC, ban nang pynskhem ia ka jingkular ban kyntiew ia ki jingialehkai jong ka bad ka jingdon bynta lang ha ka phutbol hapoh ka ri India.
Ka Royal Challenge Packaged Drinking Water, kaba la bna nam ia ka jingaiti ha kaban kyntiew ia ki kam ialehai bad ka jingiadei bad ka Royal Challengers Bangalore ha ka Indian Premier League (IPL), kala wanrah ia ka mynsiem ka jingiakhun ban jop kat kum ka jingangnud ka Shillong Lajong ha madan ialehkai.
Ryngkat lang, ki thmu ban kyntiew ia ka mynsiem ialehkai jong ka kynhun #Nayashers (Ki khla thymmai), haba ialeh ban pynrung ia ka jingiadei bad ki nongkyrshan lem bad ki trai shnong.
“Ngi dap da ka jingkmen ban pdiang sngewbha ïa ka Royal Challenge Packaged Drinking Water sha ka longiing jong ka Shillong Lajong,” ong u Bah Larsing L.D Sawyan, Managing Director ka Shillong Lajong FC.
“Kane ka jingiatreilang khlem pep kan nang aimynsiem ia ngi ban lah ialehkai bha ha ka I-League bad ban wanrah ia ka jingkmen sha ki nongkyrshan ba ieid jong ngi” ula bynrap.
Ka kynhun ka Royal Challenge Packaged Drinking Water kala pynpaw ia ka jingkmen bad ong “Ngi sngew sarong ban iatreilang bad ka Shillong Lajong FC, ka club kaba pyni shisha ïa ka mynsiem bad ka jingieid ia ka phutbol ha India.
