Shillong, Nailur 5: Ka Rangdajied United Football Club (RUFC) ha ka sngi Palei, ka la ïasoi ïa ka jingïateh kular bad ka Bengaluru Football Club ban kyntiew ïa ka sap ki nongïalehkai bad ki coach, da kaba thmu ban pynkhlaiñ ïa ka rukom ïalehkai phutbol ha ka jylla Meghalaya.
Ka jingiatreilang ka phaikhmat sha ki ar tylli ki bynta ba kongsan:
1. Ki lynti jong ki nongialehkai:
Ka MOU kan plie lad ia ki nongialehkai ba dang khynnah na ka RUFC ban iaid ha ka lynti kaba la buh ryntih ba kin kiew sha ki kyrdan kiba kham shalor ha ka jingialehkai phutbol. Da kaba ïohlad ha ka Bengaluru FC scouting program, ki lad jinghikai, bad ka jingïoh ialehkai lang bad ki rang ialehkai ba pawnam, ki nongïalehkai kin ïoh ka lad ban poi sha ki kyrdan jong ka ri bad ka pyrthei.
2. Ka Jinghikai ia ki Coach:
Ka jingiatreilang kan pynleit jingmut ruh ha kaba kyntiew ia ka kyrdan jong ki Coach ha ka rukom ai jinghikai. Ki coach ka RUFC kin ïoh jingmyntoi na ki workshop, ki mentorship program, bad ki jinghikai ba la pynlong da ki nongtrei ba la tbit jong ka Bengaluru FC, ban pynthikna ba kin don ïa ki buit bad jingnang jingstad ba thymmai tam ban pynroi ïa ki sap.
U President ka RUFC, u Eugeneson Lyngdoh, u la pynpaw ia ka jingkmen halor kane ka jingiatreilang, da kaba ong, “Kane ka jingiatreilang bad ka Bengaluru FC ka dei u mawjam ba kongsan na ka bynta ka klob jong ngi bad ki nongialehkai phutbol ha ka jylla Meghalaya.
U Director jong ka Bengaluru FC, Darren Caldiera, u la pynpaw da kaba ong, “Kane ka jingïatreilang bad ka RUFC kan ïarap ïa ngin ban pyniar ia ka jylli ha kaban ioh ia ki nongialehkai kiba don sap bad ban shem ruh ia ki nongialehkai kiban tbit ha Meghalaya bad ki thain ba marjan. Ka jingieit jong u Eugeneson ban kyntiew ia ka kam ialehkai phutbol ha ki samla bad ka jingngeit ha ki jingpyniaid kam ka Bengaluru DC ka la long kaba kongsan bha ha kane ka jingiateh lok”.
Kine baroh ar tylli ki klob kila kut jingmut ban pyntreikam ïa ki prokram ba kila pynkhreh ha ki bnai ban wan.
