Nongpoh, Kyllalyngkot 17: Ha ka jingjia tyngkhuh kali kaba shyrkhei hynne ka nohphai sngi, u wei u nongniah ka trok kaba kit ia u Clinker u la mynsaw jur hadien ba ka trok kaba u niah ka la leit ban tynrah ia kawei pat ka trok kaba wan na shilliang u surok bah.
Kane ka jingjia tyngkhuh kali ka la jia ha ka por 12 baje eiei ha surok bah NH-6 ha ka shnong Umkaliar Ri Bhoi District.
Katkum ka jingtip ba la iohlum, la iathuh, ba kane ka trok kaba kit ia u Clinker kaba don ia u number AS 01 JC 7251 ka dei kaba dang hiar na ka thain Umiam Shillong ban leit sha Guwahati hynrei tang mar ia poi ha katei ka jaka ha Umkaliar NH-06, u nongniah um shem la lah shuh ban tehlakam ia ka kali bad ula leit kiew ia u divider ban jam sha shilliang ka surok bad tynrah pat ia kawei ka trok kaba kit jingbam syiar kaba don ia u number AS 01 NC 8892 kaba dang kiew na Guwahati sha Shillong.
Ha kane ka jingjia, tyngkhuh kali, u nongniah jong ka trok kit Clinker u la sahkut hapoh ka trok kaba u niah bad hadien ka jingiakhun da ki pulit ka Umsning Police Station lem bad ki bor ka NHAI da kaba pyndonkam da ka JCB, la lah ban sei noh ia u tei u nongniah u ba la mynsaw jur bad la pynkit marmar sha Umsning CHC bad la pynkynriah noh sha NEIGRIHMS ban ioh ia ka jingsumar kaba paka.
