Shillong, Jymmang 29 : Hynriew ngut ki MLA ba dang thymmai ka Jylla, kila iakynduh ia ki Nongmihkhmat ka Ri Germany bad iatai halor ki jingtei ba kongsan jong ki lad pyniasoh (transport infrastructure) bad ka jingpyniasoh da ki kor digital (digital connectivity) haba pynbeit jingmut eh ia ki mat ba donkam hangne ha Jylla Meghalaya.
Kine ki hynriew ngut ki MLA ki dei u Myntri ba Tnad ialehkai Bah Shakliar Warjri, Kong Santa Mary Shylla, Bah Damanbait Lamare, Charles Marngar, Ian Botham Sangma bad Bah Gabriel Wahlang.
Ki Nongmihkhmat na ka Ri Germany ki kynthup ia u MP jong ka CDU/CSU Parliamentary Group Florian Muller bad u Dr Adrian Haack uba dei u Resident Representative sha India jong ka Konrad- Adenauer-Stiffung, New Delhi.
Ha kane ka jingiakynduh, kine ki arliang mamla kila iakren halor ka mat ‘digital connectivity’ bad ‘transport in India’ bala pynleit jingmut kyrpang sha ka Jylla Meghalaya.
Ka transport infrastructure (jingtei ba kongsan jong ki lad pyniasoh) bad ka digital connectivity (lad pyniasoh da ki kor digital) ki dei ki atiar ba kongsan ha ka jinglah ban treikam bha hapoh kane ka imlang sahlang ba mynta.
Haba iohi ia ka jingdonkam ban pynkhlain ia ki lad pyniasoh bad ka jingtreikam ka kor digital ha Meghalaya, kine ki MLA kila iaphylliew jingmut sani bha bad u MP ka Germany, da ka jingthmu ban pynroi ia kine ki artylli ki kam hapoh ka Jylla.
U Florian Muller, MP ka German, ula kren halor ka jingdonkam markylliang hapdeng ka transport infrastructure bad ka digital connectivity, haba ban jur ba kine ki shaniah kawei ia kawei ban lah treikam bha.
U Muller ula ban jur ba ka lad pyniasoh lyngba ki kor digital ka long kaba kongsan bha ban pynthikna ia ka jingiaid beit iaid ryntih ki kam ba iadei bad ki jingtei ba kongsan jong ki lad pyniasoh, kynthup ka Transport Management System, Traffic Montoring and Control bad ka jingiakren iakhana (communication) hapdeng u Nongniah kali bad ki passenger.
Ha kane ka jingiasyllok, ki MLA ka Meghalaya kila pynpaw ia ka jingsngewkhia halor ka jingduna ki jingtei jong ki lad pyniasoh hapoh ka Jylla. Watla ka Jylla kala kynjoh 50 snem naduh ba ioh Jylla lajong, kiba bun ki Shnong ha Meghalaya kim pat ioh satia ia ki surok kiba bha.
Ha kajuh ka por, u Bah Shakliar ula iaroh ia ka jingnang lah pynjanai bad jingnang bun ki surok hapoh ka Jylla ha kine ki san snem bala leit noh. Ula ban jur b aka long kaba kongsan ia ka Sorkar Meghalaya ban iai bteng ha kaban kynshew pisa ha kine ki kam khnang ban pynthikna ia ka jingnang kiew bad nang roi ba khlem sangeh hapoh ka Jylla.
