Shillong, Risaw 30: Kum shi bynta ban shimkhia halor ka jingkiew dor ki marbam mardih, ka tnad Food & Civil Supplies and Consumer Affairs kala pynlong ia ka “One Day Workshop on Strengthening of Price Monitoring System” hynne ka sngi Balang.
Ia katei ka jingialang la plie da u Myntri ka Tnad Food, Civil Supplies and Consumer Affairs Bah Comingone Ymbon ha ka conference hall jong ka Meghalaya Secretariat.
Haba iakren bad ki nongthoh khubor, u Bah Comingone Ymbon ula pynpaw ia ka jingkongsan ban pynneh kumjuh ia ka dor ka mur.
“Ngi lah pynlong ia ka workshop ban pynkhlain ia ka price monitoring cell. Ngi lah iatai sani bha halor katei ka mat bad baroh ki Deputy Commissioner kiba la wan sha ka jingialang. Ngam kwah ba kan don ka jingkiew dor palat bad dei halor kane ba nga la phah pynlong ia kane ka workshop” ong u Bah Comingone.
Halor ka jingud ki paidbah ia ka jingkiew dor ki marbam mardih, u Myntri ula ong, “Mynta ka sngi ngi lah rai ban kyntu ia u Myntri Rangbah ka jylla ba un wanrah lang ia baroh ki tnad kiba donbynta kiba kynthup ia ka tnad Home, Agriculture bad Food & Civil Supplies na ka bynta ban iatai shuh shuh. Hynrei kane kan urlong hadien ba la dep ka elekshon shiteng samoi ha Gambegre.”
Ka tnad Food and Civil Supplies kala pynmih ia ka jingthoh kaba la batai bniah ia ki daw kiba la pynlong ia ka jingkiewdor ki marbam kiba kongsan kum u khaw, ki jhur ki jhep, ki dai, shana bad kiwei kiwei. Katkum ka jingpynpaw jong ka tnad, ka jingbym slap thikna kala wanrah ia ka jingtyrkhong bad ha ki katto katne ki jingjia pat kala don ka jingshlei um kaba la pynduna ha ka jingpynmih ia ki marbam. Ka tnad kala kdew ruh ba ka don ka jingbym biang ha kaba iadei bad ka jingdawa bad ka jinglah ban pyndap pynbiang bad kala don ruh ka jingrem ha ka dor jongka jingbylla bad ka jingkit jingbah, khamtam ha ki jaka lum jongka Meghalaya kaba la lam sha ka jingkiew dor na ka bynta ki nongthied.
Ka tnad kala kdew ruh ba ka jylla Meghalaya ka shaniah ia ki katto katne ki marbam kiba wan nabar bad ka dor ha ki shnong ki thaw kala shah ktah na ka jingkylla khah khah ka iew ka hat hapoh ka ri.
“Ka jinglut heh na ka bynta ki nongtrei bad ka jingkit jingbah, khamtam ha ki jaka lum, kala nang pynjur ïa ka jingheh ha ka dor, kaba pynkiew dor kaba leit pat sha ki nongthied” la pynpaw ka tnad sorkar.
Ki sienjam ban pynbeit ia ki dor
Kum ka jingshimkhia ia katei ka jingeh, ka tnad Food, Civil Supplies, and Consumer Affairs kala pynbha ia ki Price Monitoring System (PMC) ha kylleng ki District ban khmih bniah bad ban buddien ia ka dor ka mur ha ka jingdie kaba man la ka sngi ia ka Retail bad Wholesale jong ki marbam mardih. Ka tnad kala pynshai “Lyngba ka PMC kila lum bad pynsaphriang iaka dor ha ka Wholesale bad Retail jong ki 22 tylli ki marbam mardih kiba kongsan ban iada ia ki nongthied bad ban pynthikna ba kitei ki marbam kidei kiba ki paidbha kin lah ban thied”.
Ka Sorkar India kala pynheh ïa ka thup jong ki mar kiban buddien na ka 22 sha ka 38 tylli bad kane kala sdang naduh ka 1 tarik u Nailar, 2024, da kaba pynïahap lang bad ki marbam kiba la buddien hapoh jongka Consumer Food Price Index (CFPI) da ka tnad Statistics & Programme Implementation. Kane kaj ingpyniar ia ka jingkhmih bniah ka long ban ai ia ka dur ka dar jong ka jinglong jingman ka dor ka mur jongki iew ki hat bad ban iada ia ki nongthied nongpet.
Ki kor Digital kiban buddien iaka dor ka mur
Ka tnad kala buh ruh ia ka Price Monitoring System (PMC) Dashboard, ha kaba da ka MIS la buh ryntih ia kid or ki mur ha baroh ki district bad subdivision jong ka Meghalaya. Kane ka dashboard ka pynlah iaki heh ophisar ban shim ia ki rai ha ka por kaba dei halor ki iew ki hat. Ki nongthied nongpet ki lah ban peit ia ka Retail Prices MIS jongka Meghalaya lyngba ka website jong ka tnad sorkar [https://megfcsca.gov.in/](https://megfcsca.gov.in/).
Ka jingkular ban pynbeit ia ka dor
U Myntri Sorkar Bah Comingone Ymbon ula pynthikna ia ki paidbah ba ka tnad ka shimkhia ban iada na ka Hoarding, Black Marketing bad Artificial Prcie Inflation.
“Ka kamram ba kongsan jong ka tnad Food, Civil Supplies, and Consumer Affairs ka long ban peit ba ki marbam mardih kidei ban long kiba ki paidbah kin kot bor ban thied ia ki. Ngi ngin trei ban pynthikna ba ka jingpyntreikam pura ia ki kyndon aiñ bad ki polisi ban iada ia ka jingmyntoi jong ki nongdie nongpet” ula ong.
Lyngba kitei ki jingshimkhia, ka sorkar Meghalaya ka thmu ban tehlakam iaka jingktah jongka jingkiew dor khah khah ia ki nongshong shnong bad ban pynthiknba ba ki marbam mardih kiba kongsan kidei kiba baroh ki lah ban ioh.
