Shillong Jymmang 12: U Chairman jongka Meghalaya Industrial Development Corporation (MIDC) James P.K. Sangma, hynne ka sngi Thohdieng, ula leit jurip iaka ophis jong ka Corporation kaba don ha Tura bad lum iaka jingialang bad ki ophisar ban iasyllok halor ki buit ban pynkhlain iaka jingtreikam ki Nongtrei bad ban pynlong ia ki jingai jinghikai ia ki nongtrei ban lah pynjanai iaka jingtreikam ki karkhana kiba don ha ka thaiñ.
Ha katei ka jingjurip, la pynsngew ha u James Sangma ia ki jingeh kiba mad da ka MIDC, Tura kum ka jingkyrduh pisa bad ka jingbym lah ban ai ka jingshakri ban ai ram ia kiba thrang ban sengkam lajong bad ia ki nongkhaii kiba don ha ka thain.
“Ngi don bun ki plan bad ka buit treikam kaba ngi dang trei na ka bynta ban pynbha ia ka rukom treikam ha baroh kawei jong ka MIDC ha ka jylla. Ngi la don lypa ha ka lynti ban sdang iaka Enterprise Resource Planning (ERP) Software, kaban pynthikna ia ki nongtrei ba kin don iala ka kamram bad ka jingkitkhlieh kum ki nongtrei jongka Corporation,” la pynpaw u James Sangma.
“Ngi don ia ka jingthmu ban pynthymmai bad ban wanrah ia ki jingdonkam kiba thymmao ha ka ophis treikam, khnang ba yn lah ban pynkhlain ia ka jingai jingshakri ia ki paidbah bad ia ka thaiñ” la ong u James.
Ha katei ka jingjurip, u James Sangma ula batai bniah shaphang ka Plan ban buh ia ki Centre bapher kum ka Loan Appraisal Center, Incubation Center bad ka Consultation Center ha ka ophis jongka MIDC Tura bad ia kane yn pyniaid shakhmat ha kine ki snem ban wan.
Ula ong, kitei ki centre kin plie lad ia ki nongseng kam ban ioh iaka jinghikai, ban don iaka jingiadei bad ban ioh iaka jingiasyllok na ki riewstad bad riewshemphang kiba don ha ki kam bapher.
“Ki karkhana kiba don ha rilum Garo ki don ia ka lad ban long kum kita ki karkhana kiban lah ban pynmih iaka khajna naka bynta ka jylla, khamtam ha ki bynta kiba iadei bad ka textiles, tourism, horticulture, food processing bad handicrafts. Ia kitei la dep ban ithuh kum kita ki bynta kiba kongsan da ka sorkar jylla, kumta ka MIDC ka don iaka thong ban shim ia baroh ki sienjam ban ai jingkyrshan na ka bynta ban kyntiew ia kine ki karkhana bad ia ki sawdong sawkun jongka” ong u Chairman ka MIDC.
Khamtam haba ka jylla Meghalaya kikarkhana kidei kiba don bynta bad ka rep ka riang, kumta ka jingdon iaka rukom pyniaid iaka khaii pateng ka long kaba kongsan kaban ai jingmyntoi iaka jylla khamtam eh ha kaban shalan ia ki mar ki mata sha ri Bangladesh kaba don marjan bad ka jylla.
Ula ong ka MIDC ka dang thaw ia ki lad ki lynti ban ioh iaka jingkyrshan kaba pura, kynthup iaka jingioh jingkyrshan haka liang ka pisa ka tyngka, ban pyniaid iew bad ban ai jinghikai pyntbit.
