Shillong, Naiwieng 21: Ka Myntri ka tnat ka koit ka khiah ka Kong Ampareen Lyngdoh hynne ka sngi Ba-ar kala ong ba kadei ka kamram jong ka ban iakren bad iasyllok bad u Myntri Rangbah bad kiwei ophisar halor rai ban shim naka bynta ki ASHA hapoh ka Jylla.
“Hashuwa ka jingialang bad ki ASHA lashai ka sngi, nga la iakren bad u Myntri Rangbah bad kiwei ophisar jong ki tnat bapher bapher naka bynta ban shim ki rai kiba biang tam naka bynta ki ASHA kiba long kiba donkam bha ia nhi” la ong Kong Ampareen.
“Ngi la shong jingialang bad nga la long bala pynkhreh ban kynduh iaki ASHA bad ban shim rai ka ban nym iatyngkhuh bad ka bha ka miat jong ki” kala ong
Ka koit ka khih haki 7000 tylli ki shnong kala ktah namar ka jingiakhih ki ASHA hapoh ka shatri Meghalaya Accredited Social Health Activist Workers Union (MAWU) ka ba la neh mynta palat 16 sngi.
Ki nongtrei ASHA kila rai ban bteng iaka jingiakhih daka ba shong kyllain mongor hakhmat Secretariat naduh 27 tarik mynta u bnai halor ka jingmynthi ka Sorkar ban kyntiew iaka bai nong shaka T.5000.
Ka Kong Ampareen kala kular daka ba ong “Ka Sorkar ka don ban pynurlong iaki mat jingdawa, kaba ka lah”.
“Namar kane ka jingialang bad ki ASHA lashai ka sngi donkam ban sngewthuh, kari ka ba ka Sorkar ka lah ban leh. Donkam ban tip ba lada sngap ia kawei ka kynhun, kiwei ki kynhun kin nym wan ban dawa. Ngi dei ka Sorkar ka ba sngap, ngin sngap kaei ka ba phi ong bad ngin ong ruh kaei ka ba phi dei ban leh” kala ong.
Ka Kong Ampareen kala kyntu iaki ASHA ban kiar ban mih sha surok namar iaki jingdawa ym lah ban pynurlong ha surok.
“Wat mih sha surok, ka surok kam lah ban pynurlong iaki jingdawa. wan shaka Sorkar, kan sngap, ngi don hangne ban sngap” kala ong.
Haba kyntait ban kular eiei, ka Myntri kala ong “Nga kren biang ba ki ASHA ki long kiba donkam bha, ngim kwah ban pynduh iaki”.
“Daka ba burom iaki ASHA, nga lah war bniah (homework) namar ym lah ban leit shaka jingialang khlem pynkhreh. Hadien bala dep ban pynkhreh ngan leit shaka jingialang ban lah ban jubab iaki” kala ong.
