Shillong, Risaw 25 : Ka Sorkar Jylla hynne ka sngi ba-ar kala iasoi ia ka Memorandum of Agreement (MOA) bad ka North Eastern Electric Power Corporation Limited (NEEPCO) ba kan pyntreikam ia ka project pynmih bording ne Hydro Electric Project ha ka Wah Umiam Stage-I bad Stage-II.
Ia kane ka soskular la iasoi ha Pinewood Hotel, Shillong ha ka jingiadon ryngkat u Symbud Myntri Rangbah ba khmih ia ka tnad bording, Bah Prestone Tynsong kum u kongsan.
U Bah Prestone ula pyntip ba ka jingpynmih bording jong kine ki artylli ki Project ki long 150 MW haba pyntip ruh ba ka Sorkar kan sa aiti sa ia ka Umiam Stage-III sha ka NEEPCO kaba la khmih lynti ban sa sdang pyntreikam noh mardor.
Kine ki prokect baroh lai tylli (Umiam Stage-I, Stage-II bad Stage-III) ki dei kiba lah ban pynmih bording haduh 235 MW. Ula pyntip ba shisien bala pyndep ia kine ki project, ka Jylla kan sa lah ban iohei ia ka bording ba kot haduh 13%.
U Symbud Myntri Rangbah ula pyntip ruh ba ka jingiasoi ia kane ka soskular ka long kaba kongsan bha ia ka Sorkar Jylla namar ka jingduna bording ba kot 50% hapoh ka Jylla.
U Bah Prestone ula kyntu ia ki Heh Ophisar ka NEEPCO ban pynthikna ba ka jingiasoi ia ka soskular hynne ka sngi kan ym kut noh tangha ki kot ki sla hynrei aka dei ban sei ia u soh. Ula kular ba ka Sorkar Jylla kan ai ia ki project ba pynmih bording haduh 1000 MW sha ka NEEPCO ha ki snem ban dang wan.
“Shen, ngin sa shong bishar ia ka soskular ba iateh bad ki kompani shimet bad ngi lah ruh ban pynduh pyndam noh ia ki” ong u Bah Prestone.
U symbud Myntri Rangbah ula ai ka jingkular ba ka Sorkar kan iatreilang bad ai ia ki jingshakri ba donkam ha kaban pynthikna ba kine ki project kin dep noh kham kloi.
“Ka jingpynmih bording ka dei ka jingeh ba hakhmat eh bala mad da ka Jylla na ka por sha ka por. Ia mynta, ka Sorkar ka dang lah ban pynmih tang 350 MW ka bording katba ka jingdonkam jong ka Jylla ka long 650 MW, kaba pyni ia ka jingduna kaba bun ha ka jingdonkam bad jingpynmih ia ka bording” ula ong.
U Bah Prestone ula ong ba ka Meghalaya ka don ia ka lad ban pynmih bording ym duna ia ka 3000 MW na ki Hydro Project hynrei mynta ka dang lah ban pynmih tang hapoh 250 MW haba pynpaw ia ka jingsngewshngain ba ka Sorkar bad ka NEEPCO ki dei ban iasoi shuh shuh ia ki soskular hadien habud.
Ia kane ka soskular la iasoi hapdeng u D D Shira, Joint Secretary ka sorkar Jylla jong ka Tnad Bording lem bad u Anil Kumar, Director Personnel, NEEPCO.
Kiwei kiba la iadonlang ki kynthup ia u Abdus Saleh, Chairman, Meghalaya State Planning Board, u Pravin Bakshi, Commissioner and Secretary ka Tnad Bording lem bad ki Heh Ophisar na ka Sorkar Jylla bad ka NEEPCO.
