New Delhi, Nailur 16 : Ia ka soskular iasuk kaba la ap khmih lynti la slem bha hapdeng ka sorkar Assam, ka sorkar pdeng bad ki kynhun seng lehnoh Adivasi ka Assam la iasoi ha ka nongbah New Delhi hynnin ka sngi Palei.
Ia kane ka jingiateh jingsuk bad ki kynhun seng lehnoh Adivasi na Assam la iasoi ha ka jingiadon ryngkat lang u Myntri ka sorkar pdeng u Amit Shah.
Ia kane ka jingiateh jingsuk la iasoi bad kumba phra tylli ki kynhun seng lehnoh Adivasi ka Assam.
Haba kren ha ka jingialang, u Myntri ka sorkar pdeng u Amit Shah ula ong ba kane ka jingiasoi ia ka jingiateh jingsuk bad ki kynhun seng lehnoh ka Assam ka dei ka ban sah kynmaw ha ka histori ka jylla bad ka thain shatei lammihngi (Northeast) hi baroh kawei.
U Amit Shah ula ong ruh ba ka sorkar pdeng ba la lamkhmat da ka BJP kala iakhun tyngeh ban lah ban weng noh ia baroh ki mat kiba dang sahteng hapoh Assam bad ha ka thain Northeast hi baroh kawei kat haduh u snem 2024.
“Kane ka dei ka sngi kaba kyrpang na ka bynta ka Assam bad ka thain Northeast. Shibun ki sienjam la shim da ka sorkar u Myntri Rangbahduh (PM) Narendra modi na ka bynta ban kyntiew ia ka thain Northeast,” ong u Amit Shah.
“Haduh kumba 1100 ngut ki dkhot jong ki kynhun seng lehnoh Adivasi ka Assam kila wan ban pyndem noh ia ki tiar ialeh jong ki bad wanphai sha ka lynti kaba dei mynta ka sngi,” ong shuh shuh utei u myntri ka sorkar pdeng.Nalor kata ula pynthikna ruh ba ia baroh ki kyndon kiba don ha kane ka jingiateh yn pyntreikam ia ki.
“Ngi kwah ia ka jylla Assam bad ka thain Northeast ba kin lait na u drok, na ki kam lehnoh, na ki jingiakynad bad ba kan kiew ha ka liang ka roi ka par.Ka sorkar u Modi kala trei borbah na ka bynta kane,” ong shuh shuh utei u myntri.
Kine ki phra tylli ki kynhun seng lehnoh ka Assam kiba la iasoi ia kane ka jingiateh jingsuk ki kynthup ia ka Birsa Commando Force (BCF), Adivasi People’s Army (APA), All Adivasi National Liberation Army (AANLA), Adivasi Cobra Military of Assam (ACMA), Santhali Tiger Force (STF) bad ki kynhun kieng atiar kiba rit kiba kynthup ia ka BCF, AANLA, bad ka ACMA.
