Shillong, K’lyngkot 10 : Ka Tnad Bording ka Sorkar Jylla, kala iasoi ia ka soskular Memorandum of Understanding (MoU) bad ka ONGC Tripura Power Company Ltd (OTPC) ban wad bad iatei ia ki hydro project ba pynmih bording hapoh ka Jylla.
Ia kane ka MoU la iasoi ha Shillong ha ka jingiadon ryngkat u Myntri Bording AT Mondal, uba la shimkhia bha dalade ban pynurlong ia kane ka jingiatreilang.
Kiba la iadonlang ki kynthup ia u Commissioner and Secretary ka tnad Bording Anjay Goyal bad u Managing Director ka OTPC Sanil Namboodiripad.
Kane ka MoU ba laisnem ka kren ia ka jingiakut jingmut ba skhem jong ki arliang manla ban wad ia ki jaka kiba bun ha Jylla ban tei ia ki hydro project hapoh ka Jylla.
Haba kren ha kane ka jingialang, u Abu Taher Mandal ula ong “Kane ka jingiatreilang ka iaid palat ia ka jingpyndap bording kaba donkam hapoh ka Jylla. Ka jingiasoi ia ka soskular ka dei u mawjam ia ka jingkut jingmut jong ngi ban pynkhlain ia ka jingpynmih bording na ki hydro project kaba dei ka lynti kaba khuid tam ban pynmih bording”.
Kane ka MoU ka kren ruh ia ki thong bapher bapher kynthup ka jingtei ia ki Pump Storage Hydro Power Project, ki Hydroelectric power project kiba rit bad ba heh bad ka lynti ban shna ia ki floating solar project.
