Nongpoh, Jymmang 21: Ban nang kyntiew ïaki sap ki phong jong ki khynnah skul ha ki kam ïalehkai, ka Saiden Secondary School kala ïasoi ïa ka MoU bad ka Lyntijam Football center, da ka jingthmu ban ai jinghikai ia ki khynnah ha ka kam ialehkai football bad ban ban pyntbit ia ki sap ba ki don.
Kum ban shu kdew hangne, ka Lyntijam Football Center kadei ka shlem ai jinghikai ïaki khynnah haka jingïalehkai photball ha kaba kala lah ruh ban pynmih shibun ki khynnah ki la ïoh ka lad ban pyntriem ïalade haka jingïalehkai phutball bad ki la ïoh ruh ban ïa shimbynta ha ki rynsan bapher bapher hapoh ka jylla bad shabar ka jylla ruh kumjuh.
Dang shen kane ka kynhun ka la ïoh ruh ban ïa leit ïashimbynta sha ka lympung ïalehkai jong ka 3rd Indo Nepal Youth Game International Championship kaba dang shu long shen ha Nepal hakaba ki thei ïalehkai na kane ka kynhun ki la ïoh ban khur ïaka takma ksiar.
Hakane ka sngi sah kynmaw jong ka Saiden Secondary School ban ïa soi ïaka Mou la ïa sakhi lang da ki Nongïalam jong ka Seng HYC u samla Richard Diengdoh President Nongpoh Circle, Secretary Ri Bhoi District u samla Tony Shylla, Rangbah shnong. Bah E. K. Lapang, Principal jong ka Saiden Secondary School u Bah James Nongsiej, President Lyntijam Football Center u bah Sumarlang Swer, Secretary shnong Saiden bah E. J. Myrthong, ki nonghikai lem bad ki khynnah skul.
Ha kawei pat ka liang, ki nongïalam ka HYC, Nongpoh Circle ki la ïoh ruh ban ïa tynrong lem ïa ka khia ka shon jong ka skul Saiden da kaba ai sngewbha da ki ben khnang ba ki khynnah skul kin ïoh ban shong ha ki por ba long skul bad la pynkup burom ïa arngut ki khynnah skul ka Saiden Secondary School kiba la ïoh ban khur ïa u takma ksiar ha ka jingïashim bynta jong ki haka jingïalehkai football kaba la long ha Nepal.
