Shillong Nailur 24: Ka sorkar Meghalaya bad ka Bill & Melinda Gates Foundation (BMGF) kila iasoi ia ka soskular MoU ban pynjanai ia ka koit ka khiah, ki jngbam kiba tei bad ka rep ka riang na ka bynta ki paid nongshong shnong ka jylla.
Ka jingphaikhmat ka long kyrpang eh ia ka koit ka khiah jong ki kmie bad ki khunlung kiba dang shu kha, ka jingpynwan dur ia ka jingdon paid ha ka iing ka sem, ka jinghikai ha kaban ai jingsumar bad ka rep ka riang bad ka kamri jingri.
Ka Meghalaya kadei ka jylla kaba lai hapoh ka ri India, hadien jongka Uttar Pradesh & Bihar ban iatreilang bad ka Gates Foundation.
Ïa kane ka MoU la ïasoi ha ka jingïadon ryngkat u Myntri Rangbah ka Jylla u Conrad K Sangma bad ka Myntri ka Koit ka Khiah ka jylla ka Dr. M Ampareen Lyngdoh, u Director jong ka India Country Office ha Gates Foundation u M. Hari Menon, u Sampath Kumar u Principal Secretary ka koit ka khiah.
Ka MoU kaba la iasoi mynta ka sngi, ka long ban pynurlong ia ki sienjam bad ban wanrah iaki lad ai jingsumar kiba biang ha ka jylla bad katei ka kynhun kala ai iaka jingkular ban shim ia kiba bun ki kam ban pynurlong ia ki thong jong ka United Nations Sustainable Development Goals, khamtam ha kaba iadei bad ka thong jong ka koit ka khiah kaba dei ban pyndep hapoh u snem 2030.
Ka MoU kan neh haduh 4 snem bad ka BMGF kan ai jingkyrshan ha kaba iadei bad ka pisa bad ka jingkyrshan da kaba ai iaka jingshemphang ban pynbha ha ki 12 tylli ki bynta ba kongsan, primary healthcare, family planning, maternal health & anaemia, neonatal health, immunisation, childhood wasting & nutrition, nursing education, supply chain management, digital health, results based financing and performance management in healthcare, competency mapping bad ban kyntiew ia ka rukom treikam jong ki tnad sorkar, ka rep ka riang bad ban kyntiew ia ka kam ri ia ki jingri.
U Myntri Rangbah ka Jylla u Conrad K. Sangma ula ban jur ia ka jingdonkam jong kane ka jingiatreilang da kaba ong, “Ngi dap da ka jingsngewkmen ba ngin don ia ka jingiatreilang bad ka Gates Foundation. Ngi donkam ban don ia ki briew kiba biang kiba don ia ka jingthmu kaba dei bad ban ia shong pyrkhat lang ban weng ia ki jingeh, ban pynbeit ia ka rukom treikam ha ki tnad bad ki jingthmu kiba ngi don.
