Shillong, Nohprah 05 : Ka Sorkar Jylla lem bad ki Nongkitkam Shnong bad ki Nongialam Niam, kila iasoi da ka Community Accord, ba pynkupbor ban ia ieng tylli kawei ha kaban iakhun pyrshah ia u droks hapoh ka Drug Rehabilitation, Elimination and Action Mission (DREAM) ha Jylla Meghalaya.
Ia kane ka Accord la iasoi ha ka prokram jong ka Tnad Social Welfare kum shibynta jong ka prokram ba dang shu pyllait shen-ka Drug Rehabilitation, Elimination and Action Mission (DREAM) bad ka Bringing Unity in Locale Against Drugs (BUILD), ban wanrah ia ka jingiatylli kawei hapdeng ki Nongkitkam Shnong bad Nongialam Niam lem bad ka Sorkar, ha ka jingiakhun pyrshah ia u droks kaba long hynne ka sngi Ba-ar ha U Soso Tham Auditorium.
Ha kane ka prokram, ka Sorkar kala ai jingiarap song pisa ruh sha ka Mawlai Dorbar ba T. 6 lak ban pyniaid ia ki Rahabilitation Camp, bala buh da ka Dorbar, ka ban pynshlur ia kiwei ki Dorbar Shnong ba kin shim lang ia kajuh ka sienjam ha kylleng ki jaka ka Jylla.
U Myntri Rangbah ka Jylla Conrad K Sangma ula pynshongkun ia kane ka prokram kum u kongsan ha ka jingia don lang u Myntri ka Tnad Social Welfare Bah Paul Lyngdoh, ka Myntri ka Koit ka Khiah Kong Ampareen Lyngdoh, u Director General of Police Dr LR Bishnoi bad kiwei kiwei.
Haba kren ha ka jingialang, u Myntri Rangbah ula ong ba ki samla ki dei ka spah bah ia ka Jylla bad ka Ri ban kyntiew ia ka ioh ka kot.
“Shibun bah ki policy bad ki prokram jong ka Sorkar ki dei kiba phaikhmat sha ki samla ba kin ioh ia ka policy kaba khlain kaba long kongsan na ka bynta ki khun samla jong ngi” ula ong.
U Myntri Rangbah ula ong ba ki Khynnah kim shym la ioh bha ia ka jingsneng jingkraw ha ka por kaba dei bad kane ka dei kawei na ki daw kaba ialam ia ki sha ka lynti ban dih ia u droks.
Ula batai bniah ruh ba kumno ki prokram bapher bapher jong ka Sorkar Jylla ha ki kam ialehkai, ka put ka tem, ka sengjam sengjam ka iasnoh bad ki samla khnang ba kin lah ban pyndonkam ia ki sap jong ki ha ki kam kiba tei bad ban nym ngop ha u drok. “Shisien ba kila sngewthuh ia ka nongrim bad ka thong ha ka jingim, kin sa pynleit jingmut bad trei shitom ban kynjoh ia kata” ula ong.
U Myntri Rangbah ula pynbna ruh ba ha ka CM Elevate Prokram, kan sa don ruh ka bhah ia ki seng kiba ieng iakhun pyrshah ia u droks bad ia ki briew bala lait na u kynjri jong u droks ba kin sengkam sengjam lajong.
Haba kren halor ka BUILD prokram, u Myntri Rangbah ula ong ba ka Meghalaya ka don ia ka bor synshar shnong kaba khlain bha bad ki nongialam shnong ki shim ia ka bynta kaba khraw bha ha ka imlang sahlang ha ki shnong ki thaw.
“I aka kam kum u droks, ki Dorbar Shnong ki dei kiba kongsan bha ym tang ban pynduh ia droks hynrei ban ai jingiarap ruh ia ki nongdih ba kin lait noh na une u jingdih ba sniew bad ruh ban lah pynlong ia ka DREAM Mission kaba jop” ula ong.
Ula bynrap ba katba ka Tnad Pulit, ka Koit ka Khiah bad ka Social Welfare ki donkam ban iatreilang, ka long ruh kaba kongsan ban iatreilang bad ki Dorbar Shnong. Ula ban jur ruh ia ka jingkongsan ban kren ia ki nongdih droks da ka jingsngew synei bad jingieid ym ban pynlong sohpdung ia ki.
U Myntri ka Tnad Social Welfare Bah Paul Lyngdoh ula ong ba ka Sorkar kala ialehkai kat kaba lah ban pynthikna ia ka jingpynduh jait ia u droks na Meghalaya. Ula ai khublei ruh ia ki Seng trei monsngewbha, ki Seng Niam bad ki Dorbar Shnong kiba la ai ka jingkyrshan ha ka jingiakhun pyrshah ia u droks ha Jylla.
Kiwei pat kiba la kren ha kane ka jingialang ki kynthup ia u DGP ka Jylla Dr LR Bishnoi bad kiwei kiwei.
The responsibility lies on each of us as members of the community to support those gripped by the drug menace and encourage them to overcome their addiction. The testimonials today are positive message of hope for those needing a breakthrough.
As a Govt. we are committed to… pic.twitter.com/KShWrNt39D
— Conrad K Sangma (@SangmaConrad) December 5, 2023
