Shillong, Iaiong 16 : Uwei u Heh Nongialam ka Voice of the People Party (VPP) na Mawryngkneng Constituency, ha ka sngi Ba-ar, ula mih noh na ka VPP bad leit pyniasoh noh sha ka National People’s Party (NPP).
Une u Nongialam ka VPP u dei u Bah Rang Kharduit, uba bat kum u President ka VPP Mawryngkneng Constituency.
Ia u Bah Rang la pdiang sngewbha da u State President ka NPP bad Symbud Myntri Rangbah ka Jylla Bah Prestone Tynsong lem bad kiba bun ki Nongialam ka party ha ka jingialang ialap elekshon ba long hynne ka sngi ha Smit, kaba hap hapoh ka Nongkrem constituency.
Haba kren ha ka jingialang, u Bah Rang ula ong ba ula rai ban mih noh na ka VPP hadien ka jingiohi ia ka policy treikam bad ki nongrim jong kane ka party, kiba long pyrshah ia ka jingkhmih lynti jong u paidbah.
“Ka long kaba sngewsih ban iohi ia ka policy bad ka nongrim treikam jong ka VPP. Nga dei u President ka Mawryngkneng constigtuency hynrei hadien ka jingiohi ia ka policy ka VPP, nga la rai ba kam iahap ia nga ban iadonlang bad kane ka party” ula ong.
