Shillong, Naiwieng 10 : U President ka Meghalaya Pradesh Congress Committee (MPCC) Bah Vincent H Pala ha ka sngi Ba-ar ula ong ba ki MLA kiba leit iasoh sha ka BJP kila pyniap hi dalade ha ka sain pyrthei bad kila nang jur ka jingkhuslai mynta ban ia kaba long hashuwa ba kin leit iasoh sha kane ka party.
U Bah Pala ula ong ba ki jingphet seng hashuwa ka elekshon ki dei kiba ju jia beit, hynrei ka BJP kala pyndonkam ia ka spah jingdon jingem ban khroh ia ki nongialam da ki jingkular kiba kam bat satia.
“Nga tharai ka ju jia beit hashuwa ki elekshon, ka jingleit iasoh bad jingkynthih seng. Ka BJP, ki don bun bah ki jingdon jingem ban pynbeit ia ki briew” ong u Bah Pala. “Kum ka nuksa, phi la iohi ia ki briew kiba leit iasoh bad ki, mynta kila nang khuslai ban ia kaba long hashuwa”.
Halor ka jingkam u President ka BJP Rikman G Momin ba kin dang bun ki MLA kiba la khreh ban wan iasoh sha ka BJP, u Bah Pala ula ong ba ka BJP kan kam lut ia kiei kiei baroh, hynrei ki jingtreikam jong ka ha ki snem bala leit ha Meghalaya kila pyni da kumwei.
“Lada phi peit ia ka histori jong ka BJP, kat kiba iasoh sha ka BJP ha Meghalaya, lait noh u Bah AL Hek bad Bah Sanbor Shullai, kiwei kiwei Nga tharai kin pyniap dalade ialade” ong u Bah Pala.
Ula batai antad ba kajuh kan long ia ki phra ngut ki MLA barim ka United Democratic Party (UDP) kiba iasoh dang shen sha ka BJP.
“Wat kine ki phra ngut ki MLA kiba la leit soh, Nga tharai ba kin sa leit phai biang shala ka jong ka party lane sha kiwei ki party lada ka BJP kam bat iala ki jingkular” ula ong.
U bah Pala ula kynnoh ia ka BJP ha Meghalaya ba kam don satia ia ka policy treikam kaban neh kumjuh bad ka dei ruh ka bym ju bat iala ki kyntien.
Ula kynnoh ruh ba ka BJP kam ju pyrkhat na ka bynta ki ritpaid bad ki khristan.
