Shillong, Naitung 20: U Secretary ka Meghalaya Pradesh Congress Committee (MPCC) Bah Manuel Badwar ha ka sngi Nyngkong, ula leit iashimbynta lang ha ka jingiakhih jong ki samla pule ha Don Bosco Square, Laitumkhrah, ban ai ka jingkyrshan ia ka jingdawa shim jingkitkhlieh halor ka jinglait tuh jong ki jingkylli bad ban wanrah ia ka jingkylla ha ka pule puthi.
Haba iakren bad ki nongpathai khubor, u Bah Badwar ula ong ba kane ka jingiakhih ka pyni ia ka jingbitar jong ki samla ha kaba ka lawei ka jongki kala shah iuhroit noh.
“Ngi don hangne ban ai jingkyrshan bad jingsngewlem ia ki samla pule baroh” ong u Bah Badwar.
“Kane kadei ka khyllipmat kaba kongsan. Ka jingbitar ki samla, khamtam ki samla pule kaba ka lawei ka jongki kala shah ktah jur bha da ki jingleh bakla jong ka sorkar, kadei kaba shisha. Ka politik kala leh ia ka bynta kaba khraw ha ka pule puthi bad ia ka sorkar ban shim ia kane ba ka long kaba rit kadei kaba bakla jur” ula ong.
Ula ong, ba ka jingiakhih kam dei satia halor ka politik hynrei kadei namar ka jingsngew kutlad.
“Kine kidei ki samla kiba lah nang lah stad, kiban ym mih kumne. Hynrei namar ba ki sngew bynniaw bha. Ki longiing longsem kiba la iakhun tyngeh ban phah ia ki khun sha ki skul ruh kila sngew bynniaw. Haba ka politik kala lehkai, ka wanrah ia ka jingjia kaba ym poi pyrkhat ha ka pule puthi ia kaba ka sorkar ka ialeh ban kyntait ban leh eiei” ong u Bah Badwar.
Ha kaba iadei bad ka jingdawa ba u Myntri ka Sorkar Pdeng uba khmih ia ka pule puthi u dei ban hiar shuki noh, u Bah Badwar ula ong, ba ka Sorkar Pdeng kala pulom ha kaban leh eiei ia katei ka jingjia kaba sngewkhia bha.
“Kane ka pyni ia ka lawei jong ka ri, ka jylla bad ia ka imlang sahlang ka jong ngi. Ka sorkar kan ym lah ban iai bteng ban kyntait ia kane bad ban bteng ban leh ia ka kam ha ka lynti katba ka sngew mon. Kane ka pyni ba ka pule puthi kam don satia ha ka mat treikam ka jongki” ula ong.
U Bah Badwar ula ong, ba ka rukom treikam ka donkam ban pynbeit noh ha baroh ki liang.
“Ia kane ka rukom treikam donkam ban pynkylla bad pynthymmai noh. Lada ngim lah, ngin iai bteng ban duh ia ki jingmyntoi. Ka jingstad shimet jong ki briew kaba dei ban ioh lyngba ka pule puthi kan ym wan shuh. Ha kane ka sngi bad ka juk, ka pule puthi ka dei kaba long pdeng ha ka ioh ka kot bad ka roi ka par ha ka imlang sahlang” ula ong.
U Bah Badwar ula pynshai ba ka jingwan ki nongialam ka MPCC ka long kum ki nongshong shnong.
“Ngi ieng ryngkat bad ki samla pule bad ka ri hi baroh kawei. Ka Liang Pyrshah ha Delhi kala rah tyngeh ia kane ka mat bad ngi ngeit ba man la ki nongshong shnong kidei ban ai jingkyrshan ia ki” ula ong.
“Ngi don ryngkat lem bad ki bad ngin iai bteng ban ban don bad ki. Ka lawei jong ka ri ka shong ha ka jingdonkam ban iaid da ka lynti kaba thymmai, ym da kane ka lynti iaid kaba ngi ia don mynta” ula bynrap.
 Bah Manuel Badwar ha ka sngi Nyngkong, ula leit iashimbynta lang ha ka jingiakhih jong ki samla pule ha Don Bosco Square, Laitumkhrah, ban ai ka jingkyrshan ia ka jingdawa shim jingkitkhlieh halor ka jinglait tuh jong ki jingkylli bad ban wanrah ia ka jingkylla ha ka pule puthi.){kind=link}