Shillong, Naiwieng 27: Kum shi bynta ban pynioh ia ki lad jingsumar ha baroh ka thaiñ Shatei Lam Mihngi ka ri India, ka Indian Oil Corporation Limited (Indian Oil) kala iasnohkti bad ka Fairfax India Charitable Foundation bad ka Sorkar Meghalaya ban pynbiang ia ki 6 tylli ki Haemodialysis Machine na ka Pradhan Mantri National Dialysis Program (PMNDP).
Ia kane ka jingiatreilang la pynskhem lyngba ka jingiasoi ia ka jingiateh kular hapdeng kine ki 3 tylli ki liang mamla ha Nongbah Guwahati.
Ka jingpang Khyllai ne Kidney ka dei kaba jur bha bad kaba buh jingeh bha iaka koit ka khiah jong ki paidbah ha ri India, kaba la ktah ia kumba 1.3 million ngut ki nongpang kiba donkam ban leh ia ka haemodialysis kata 2-3 sien ha ka shi taiew.
Ha baroh kawei ka ri, ka jingdawa ïa ki Haemodialysis Machine kala palat lypa ïa ka jingdon jong kine ki kor, ha kaba la don tang 35,000 tylli ki mashin katba ka jingdonkam pat ka long palat ia ki 200,000 tylli. Na ka bynta ki nongshong shnong ha nongkyndong, ka jinglut jingsep ban leh ia ka Haemodialysis ka kot sha ka (₹2.4 lak shi snem), nalor ka jingshem jingeh ha ka leit ka wan bad ka jaka sah kaba la buh haka jingeh kaba khraw ban ioh ia kane ka jingsumar ban iada iaka jingim.
Ka jinglong jingman jongka koit ka khiah ha jylla Meghalaya ka kham jynjar bha bad bun ki district ki duna ia ki jaka sumar ban leh ia ka Haemodialysis, kaba ki jaka sumar kiba la don lypa kila mad ia ka jingkiew ha ka jingjur jongka jingdawa. Ka jinglong ki jaka ka jylla kala nang pynjynjar shuh shuh ban poi sha ki jaka sumar kiba don ha sor bad kala pynlong ïa ki nongpang na ki thain nongkyndong ryngkat bad ki bahaïing hasem ban khia ka jingkit ha ka jinglut jingsep ban pynbiang ia ki jingdonkam.
Katei ka jingthmu kan ai jingmyntoi ïa ki nongpang kiba don ha ki district kum ha East Garo Hills & Ribhoi bad ka thmu ban pynduna ia ka jingsangeh noh jong ki nongpang ia ka jingsumar namar ki jingeh ha ka liang ka jingpynbiang ia ki jingdonkam, ban pynduna ia ka jingiap bad ban thaw ia ki lad kamai ha ka koit ka khiah hapoh kitei ki thain.
Haba kren ha ka jingialang u Udit Jain, Chief General Manager (HRD & ER), ka Indian Oil, ula ong, “Kane ka jingïatreilang ka pyni ïa ka bor jongka jingïatreilang hapdeng ka sorkar bad ki riewshimet ha ka jingïakhun pyrshah ïa ki jingeh kiba kongsan ha ka koit ka khiah. Da kaba pynioh ia ka jingai jingsumar lyngba ka Hemodialysis, ngi iengskhem ha kaban wanrah ïa ka jingsumar kaba lah ban iada iaka jingim briew ha ki shnong kiba duna ka jingioh iaka jingshakri ha kylleng ka thaiñ.”
Haba bynrap ïa katei, u Hitajit Bhattacharyya, u Chief General Manager (Human Resource), Guwahati Refinery, Indian Oil Corporation Limited ula ong, “Ka thong jong ngi ka long ban pyndap ïa ka jingduna ha ka liang ka koit ka khiah ha kane ka thaiñ Shatei Lam mihngi. Kane ka sienjam kadei ka sakhi ïa ka jingaiti jong ka Indian Oil ban pynbiang ïa ki jingshakri ha ka koit ka khiah kiba ïaryngkat ha ki jaka kiba don ha ki jaka kiba bha”.
Ula ong, ba ka jingnoh synniang jong ka Indian Oil ia ki 6 tylli ki Haemodialysis mashin kan nang pynkhlain shuh shuh ban wanrah ïa ki jingshakri kaba jan ia ki shnong kiba duna ha ka jingioh ia ka jingshakri bad kan pynbha shibun ha ka liang ka koit ka khiah. Kane kan iarap ia ki shnong ki thaw ha Meghalaya ki bym don ia ki lad ki lynti kiba lah ban iada ia ka mynsiem briew.
