Shillong, Nailar 23 : U Myntri Rangbah ka jylla, Conrad K Sangma hynne ka sngi u la leit ban shim bynta ha ka lehniam Behdienkhlam kaba long ha Mukhla, West Jaintia Hills.
Haba ai khublei ia ki paidbah ha katei ka jinglehniam, u Myntri Rangbah u la ong ba ka long ka jingkmen kaba khraw ba u iohlad ban don bynta lang bad ki paidbah ha katei ka lehniam kaba khraw jong ka Behdienkhlam kaba ki la ioh ban pynlong biang hadien arsnem na ka daw ka jingwan jong ka khlam COVID.
So happy to witness the Mukhla Behdienklam organized by Seiñ Raij Mukhla. I thank them for inviting me to celebrate with them.
Behdienkhlam is the most important dance festival of the Pnars of Jaiñtia Hills of Meghalaya@PMOIndia @kishanreddybjp pic.twitter.com/8SBz6c8BK2
— Conrad Sangma (@SangmaConrad) August 23, 2022
“Ka pynkmen ia ka mynsiem jongnga ba ngan ioh ban don bynta lang ha ka jingrakhe ia ka kolshor, ka jingngeit bad ka tynrai jong ka jylla bad kum ka sorkar ngi don barabor ka jingthrang ba ngin kyrshan bad kyntiew ia ka kolshor, ka riti dustur jong ki paidbah ka jylla lyngba ki prokram bad ki skim bapher bapher,” u la ong.
U la iathuh ruh ba ka sorkar jylla ka ju iai kyrshan ia ki paidbah ba kin pynlong ia kum kitei ki jinglehniam bad ka ju bei tyngka ruh na ka bynta ban pynbha shuh shuh ia ki jingtei khnang ba kin lah ban pynlong ia kum kitei ki prokram jong ki.
Ha kane ka sngi u Myntri Rangbah u la kular ruh ba un ai ka jingkyrshan pisa naka bynta ban pynbha ia ka Sein Raid Mukhla khnang ban pyntikna ba ka lehniam Behdienkhlam kan iai bteng ban pynneh pynsah ia ka jingngeit tynrai u mynbarim bad ruh ba kan khring ia bun ki paidbah bad ki nongwan jngohkai pyrthei sha katei ka jaka lehniam.
Ha kane ka sngi la donlang ruh u Bah Sosthenes Sohtun, MLA Jirang bad ruh u MLA ka Jowai Bah Wailadmiki Shylla nalor ki MDC jong ka Jaintia Hills Autonomous Council.
