Shillong, Risaw 20 : Da ki spah ngut ki rang bad ki thei iakop mareh, kila iashimbynta ha ka “Fit India Run” bala pynlong da ka Ophis u District Sports Officer ka Ri-Bhoi District, Nongpoh hynne ka sngi palei, kaba la sdang na shnong Jyntru sha Indoor Stadium, kaba don ha Umlyngkdait, Nongpoh.
Ka thong jong kane ka Fit India Run ka long ban pynsaphriang ia ka khubor sha ki paidbah halor ka jingkordor ka koit ka khiah bad ka met ka phad ha kaba ka Sorkar Pdeng kala ot ribbon ia ka Fit India Movement ha ka 29 tarik Nailar 2019 da u Myntri Rangbah Duh ka Ri.
Ia ka jingialang la pynlong ha kane ka Stadium ha kaba la iashimbynta da u Additional Deputy Commissioner Bah MB Tongper, u DSO Bah Bobby L Nongbet bad kiwei kiwei.
Ka Ophis u DSO kala sam ruh ia ki khusnam sha ki nongjop ba kynthup ia u Skhemlang Suba uba wan ba nyngkong, u Monas Bongrung uba wan ba-ar bad u Lapynkhreh Thabah uba wan balai.
Ha ka jingiamareh ki Kynthei, ki nongjop ki kynthup ia I Barisha Khymdeit, Sildaris Makri bad Dakahi Kyndait.
