Shillong, Risaw 24: Ki jylla hapoh ka ri India naduh ka 2 tarik haduh ka 31 tarik u Risaw kala rakhe ia ka ‘Khadi Mahotsav’ halor ka matpdeng “Khadi for Nation, Khadi for Fashion” da ka jingthmu ban kyntiew iaka Khadi & Village Industries, Handloom & Handicraft, ODOP bad ki tiar ki tar kiba la pynmih da ki karkhana rit kiba don ha kylleng jong kane ka ri.
Ka jingthmu jong katei ka prokram ka long ban kyntiew ia ki tiar ki tar kiba la shna bad pynmih da ki karkhana rit bad kiwei kiwei lyngba ka “Vocal for Local” Campaign bad ‘AtmaNirbhar Bharat Abhiyan’ kumba la iohi jngai da u Myntri Rangabhduh ka ri.
Ha kaba iadei bad kane, na ka liang ka State Office jongka Khadi & Village Industries Commission, Shillong (Meghalaya) kala pynlong ia ki prokram ki bapher kum ka Seminar, Khadi Yatra, Khadi Charcha & Khadi Pledge ha Gandhi Buniyadi Secondary School, Pynthorumkhrah, Shillong ha ka 18 tarik u Risaw ia kaba la wan ban iashimbynta da bun ngut.
Ha katei ka jingialang u Mange Ram, State Director, Khadi & Village Industries Commission, Shillong ula ai jingbatai halor ki Schemes bapher jongka KVIC bad ula iakren ruh bad ki khynnah pule ha kaba iadei bad ka Khadi Charcha.
Ha katei ka jingiakren, ki khynnah pule kila buh jingbuh jingkylli bad kila ioh ruh ia ki jubab bad iaki nuksa halor ki jingkylli kiba kila buh.
Kila don 90 ngut ki khynnah pule kynthup ia ki bor pyniaid skul jongka Gandhi Buniyadi School kiba la iashimbynta ha ka Khadi Yatra.
