Nongstoiñ, Jymmang 22: Kumba ju leh man la u snem, ka Seng Khasi West Khasi Hill ka la pynlong ïa ka shad suk mynsiem shisien ha madan jong ka shnong New Nongstoiñ, ban ai nguh ai dem ïa u Blei Nongthaw Nongbuh ïa u khun bynriew ha kane ka sla pyrthei.
Kane ka jingshad ka la sdang ha ka por lai baje janmiet bad la pynkut noh ha ka por san baje. Ha katei ka shad suk mynsiem la wan ban ïashim bynta shitrhem da ki rang bad ki thei sotti na ki lai tylli ki district, kata na Eastern West, South West bad West Khasi Hills.
Ha shuwa ba ka jingshad kan sdang, u rangbah nongpynïaid jong ka Seng Khasi u la duwai phirat bad ainguh aidem ïa u Nongthaw Nongbuh ïa ka long briew man briew ïa ka longkur long jait ban roi parum pareh ha u tnum u tyndai ha kane ka snieh pyrthei. Ha kane ka sngi ka ksing ka dhah bad ka tangmuri ki sawa bad pynpaw ïa ka dak jong ka niam ka rukom ba la buh naduh kulong kumah. Naduh ki khynnah ba dang rit ki la ïashim bynta shitrhem ha ryngkat ki khor ki khriam jong ka riam tynrai kaba ishongkun bha
Haba iakren bad u Rangbah P.Ryntathiang uba dei u President jong ka Seng Khasi West Khasi Hills,u la ong ba naduh hyndai kawei pa kawei ka kur hapoh ka ri Khasi, ki don la ka jong ka jong ka jingshad bad ki ju pynlong ruh ha man la ki shnong.
Hynrei dei tad hadien ba ki bor ba na shabar ki la wan lynsher ïa ka jait bynriew, suki suki ka la sdang ban jah, kumta na ka bynta ban pynneh pynsah la ka riti ka dustur ba la buh da ki long shuwa ka Seng Khasi ka ju pynlong ïa katei ka shad suk mynsiem shisien man la u snem.
U la ong ruh ruh ba ha ka por ba dang khunlung ka kmie bad u kpa ki thum ki pynshad ïa ngi ha ka pneh jong ki bad kane ka jingshad kam dei satia kata ka jingshad kaba ki ong shad disco ne shad kmen. Hynrei ka dei ka jingshad kaba don ïa ka jingmut kaba kyrpang na ka bynta ka riti ka dustur u Hynñiewtrep.
