Shillong, Naiwieng 4: U Myntri ka Sorkar Pdeng ba khmih ia ka Jal Shakti, Gajendra Singh Shekhawat, ula iaroh ia ka jylla Meghalaya halor ka jinglah pyntreikam bha ia ka Jal Jeevan Mission (JJM) ban pynpoi umbam umdih sha ki longiing hapoh ka Jylla.
Ka jingpynpoi umbam umdih jong ka sorkar Meghalaya sha ki thliew iing kala kot mynta sha ka 41.5 percent, kaba tam haduh 5.5 percent ia ka National Average kaba kot 36 percent.
Haba ianujor ia kane, u Myntri ula ong ba ha ka por ba pyllait ia kane ka skhim, ka Jylla ka kot tang 1% ka jingpynpoi kor um ha ki iing briew ha ki jaka nongkyndong. Hynrei ha kine ki snem, ka Meghalaya kala jam shakhmat bad kala lah ban kot haduh 44.5% ka jing pynpoi kor um.
U Myntri ula kren ia kane hadien ka jingia lang bishar kam ia ki skhim bapher bapher jong ka sorkar India kum ka Jal Jeevan Mission, Pradhan Mantri Krishi Sinchayee Yojana-Har Kher Ko Pani, Springshed Development Project for Rejuvenation of Springs for Climate Resilient Development ha Meghalaya kaba long hynnin ka sngi palei.
U Myntri ula ong ba na ka 6.30 lak tylli ki iing, ka jingpynpoi kor um sha kk iing briee kala kot ia ka 2.61 lak. “Nga ngeit skhem ba ka Meghalaya kan pyndep ia ka jingpynpoi kor um sha baroh ki longiing hapoh ka por bala buh” ula ong.
U Myntri ula iaroh ruh ia ka jingtrei shitom jong ka sorksr Meghalaya halor ka project Spring rejuvenation and watershed management. Ula ong ba ka jingjop jong ka Meghalaya ha kine ki bynt kin long ka nukda ia kiwei kiwei ki Jylla ula bynrap.
U Myntri ula pynpaw ba u ngeit skhem ba ka Meghalaya kan dei ka nongrah dongmusa hapdeng kiwei pat ki Jylla ka thain Shatei Lam Mihngi da ka jingwan rah ruh ia ki project bapher bapher bad ban lah pynurlong ia ka jingphohsniew jong u Myntri Rangbah Duh ka Ri ban long ka kor ka roi ka par jong ka ri.
Shuwa kane, u Myntri Rangbah Duh ka Ri ula pyllait ia ka Jal Jeevan Mission ha ka 15 tarik Nailar 2019 na Red Fort ban pynpoi kor um sha ki 19.15 klur ki longiing ha nongkyndong ka Ri India.
