Shillong, Jymmang 12 : U Myntri Rangbah Duh ka Ri Narendra Modi ula ai ka jingiaroh ia ka jingjop kaba khraw jong ka ‘Operation Sindoor’ da kaba ainam ia ka sha ka “Bor ki Kynthei “ (Nari Shakti) haba phah ruh ia ka khubor kaba tyngeh ia ki kynhun lehnoh jong ka Pakistan.
Haba kren sha ki nongshongshnong ka Ri ha ka miet sngi Nyngkong, u PM Modi ula pyniasoh ia ka jingiadei hapdeng ka jingpyniap im im peit peit kaba itohmet ia ki Kynthei nong India bad ki Khynnah da ki lehnoh-bad ka jubab kum u pyrthat jong ki bor shipai ka ri India.
“Ka Pakistan ka pyrshang ban pyndam ia u sindoor na ka shyllang jong ki Kynthei jong ngi. Ngi la pynpra phom ia ki skulbah jong ki lehnoh kaba hikai ban leh ia kum kine ki kam” ong u Narendra Modi.
Ula jer kyrteng ia ka Bahawalpur bad Muridke kum kita ki “skulbah ki kam pyntriem ba shyrkhei” kiba long ki jaka pynkha ia ki jingmut jingpyrkhat lehnoh bad ban hiar thma pyrshah ia ka India.
Da ka ‘Operation Sindoor’ kaba lam sha ka jingiap jong palat 100 ngut ki lehnoh kynthup ki Nongialam ba hakhlieh, u Myntri Rangbah Duh ula pynthikna ba ka jingpynphai kylliang ka India kala kren ha ka sur kaba ka Pakistan ka sngewthuh bha-ka bor, ka jingbeit ba thikna bad ka jingkut jingmut ka bym pat ban pyndem. “Ka Pakistan kala ioh ia ka bainong kaba pura. Bad lada donkam, ngin leh biang sa shisien” ula ong.
U Myntri Rangbah um shym la kyllain bun ktien haba sei madan ia kaei kaba u ong “ka jinglong lyngkar ki shipai Pakistan” haba ban jur ba kam long eiei ban ianujor bad ka jinglong discipline, ka jingkhlain bad ka jingshlur jong ki shipai India.
U PM Modi ula pyntip ruh “Ka dei ka Pakistan kaba wan ban khroh ia ka jingsuk, ym ka India. U DGMO jong ki ula phone haba ki sngew ba kim lah shuh ban iai shah ia ka jingther ha ka India” ula bynrap.
Kaba kham kongsan ka long ba u Myntri Rangbah u la kren shai ba ka Operation Sindoor kam pat kut, la shu pynsangeh shipor. “Man ka shi inshi ka khyndew kaba ai jaka ia ki kam lehnoh—wat la ka jngai katno katno ruh—ka dang long hi ki jaka kiba ki shipai jong ngi kin poi beit” ula maham haba pyni ba ka jingiakhun pyrshah lehnoh jong ka India ka la kylla stet bha.
Haba kynthoh halor ka jingbyrngem pynbthei bmb nuclear, u PM Modi ula ong “Kam don jingiapher hapdeng u lehnoh bad uba ai jaka rieh ia u lehnoh. Ka India kan jubab ia baroh ar. Ka jinglong ba thymmai ka long kaba shai—ka India kan hiar thma biang. La ka dei hangno hangno, ne iano iano ruh.”
 haba phah ruh ia ka khubor kaba tyngeh ia ki kynhun lehnoh jong ka Pakistan.){kind=link}